"Пяцёрка" супраць Беларускага тэлебачаньня :: Хартыя'97 :: Навiны

"Пяцёрка" патэнцыяльных кандыдатаў у прэзыдэнты зьвярнулася з адкрытым лістом да Генэральнага пракурора Беларусі Віктара Шэймана. Сямён Домаш, Міхаіл Чыгір, Павал Казлоўскі, Уладзімер Ганчарык і Сяргей Калякін зьвяртаюць увагу кіраўніка беларускай пракуратуры на факты распаўсюджваньня ў інфармацыйна-аналітычных перадачах Нацыянальнай дзяржаўнай тэлерадыёкампаніі Беларусі "паклёпніцкіх выдумак і распальваньня нацыянальнай варожнасьці".

"Апошнім часам, несумненна, у сувязі з прэзыдэнцкімі выбарамі, усё часьцей у інфармацыйна-аналітычных перадачах Беларускага тэлебачаньня выкарыстоўваюцца недапушчальныя з маральнага і прававога пунктаў гледжаньня брудныя прапагандысцкія тэхналёгіі, якія маюць за мэту прадставіць у загадзя памылковым, скажоным сьвятле нашу пазыцыю па прынцыповых грамадзка-палітычных, дзяржаўных пытаньнях, у тым ліку датычных нацыянальнай палітыкі, стаўленьня да Саюзу Беларусі й Раеійскай Федэрацыі", -- зазначаецца ў звароце "пяцёркі".

Прычым, як падкрэсьліваецца ў дакумэнце, "усё гэта падаецца з наўмысным нагнятаньнем істэрыі і страху, не можа быць кваліфікаванае іначай, як адкрытая правакацыя не толькі ў дачыненьне да нас асабіста, але і да ўсіх, хто мае іншыя погляды, якія не супадаюць з цяперашнім курсам кіраўніка дзяржавы".

У якасьці прыкладу ў лісьце прыводзіцца сюжэт, паказаны 3 чэрвеня ў праграме Беларускага тэлебачаньня "Рэзананс", у якой члены кандыдацкай "пяцёркі" былі прадстаўлены як русафобы, якія выступаюць супраць Саюзу Беларусі й Расіі.

Аўтары звароту расцэньваюць падобныя прыёмы, узятыя на ўзбраеньне дзяржаўнай тэлерадыёкампаніяй, як антыканстытуцыйныя, якія "па сутнасьці, садзейнічаюць распальваньню ў нашым грамадзтве нацыянальнай варожасьці".

"Пяцёрка" выказвае спадзяваньне, што Генэральны пракурор адрэагуе на гэтае пасланьне і прыме "належныя меры пракурорскага рэагаваньня".