Пікеты "Хочам ведаць праўду " прайшлі ў далёкім замежжы :: Хартыя'97 :: Навiны

Сьледам за гарадамі Амстэрдамам, Брусэлям, Кіевам, Масквой да акцыі "Хочам ведаць праўду", што праводзілася па ініцыятыве АГП, далучылася Варшава. На мінулым тыдні там адбылося пікетаваньне беларускай амбасады. Мэта акцыі - выказаць пратэст беларускім уладам ходам расьсьледаваньня крымінальных справаў, прыцягнуць увагу палякаў да праблемы зьнікненьня ў Рэспубліцы Беларусь вядомых палітыкаў Ю.Захаранкі, В.Ганчара, прадпрымальніка А.Красоўскага, журналіста З.Завадзкага.

Як паведаміў 4 чэрвеня на сустрэчы з журналістамі лідэр АГП Анатоль Лябедзька, АГП сканчвае падрыхтоўку другога спэцыяльнага выпуску газэты "Народная воля", прысьвечанага лёсу зьніклых. Як паведаміў Анатоль Лябедзька, ужо ёсць дамоўленасьць аб падтрымцы гэтай акцыі з боку Партыі БНФ і грамадзянскай ініцыятывы "Хартыя`97".

Анатоль Лябедзька падвёў вынікі травеньскай кампаніі АГП. Паводле ягоных словаў, карыстальнікамі інфармацыі аб ахвярах палітычных рэпрэсыяў у Беларусі сталі больш чым 2 мільёны грамадзянаў рэспублікі. Інфармацыя аб зьнікненьні Віктара Ганчара, Юры Захаранкі, Анатоля Красоўскага, Зьміцера Завадзкага распаўсюджвалася праз спэцыяльны выпуск газэты "Народная воля", агульны наклад якога склаў 500 тысячаў асобнікаў, а таксама праз іншую друкаваную прадукцыю.

Акрамя таго, на працягу месяца АГП правяла ў сталіцы акцыю "Ланцуг неабыякавых людзей", а таксама арганізавала пікеты ў 40 рэгіёнах Беларусі й шэрагу эўрапейскіх сталіц -- Бруселі, Амстэрдаме, Варшаве, Таліне, Маскве й Кіеве.