Буйныя беларускія прадпрыемствы працуюць па 3-4 дні на тыдзень :: Хартыя'97 :: Навiны

З прычыны эканамічнае крызы ўсё больш беларускіх прадпрыемстваў мусяць скарачаць вытворчасьць. Учора на 3-дзённы працоўны тыдзень перайшоў менскі завод "Калібар". Сёньня пераходзіць на 4-дзённы працоўны тыдзень яшчэ адно буйное прадпрыемства - аб`яднаньне "БелВАР". Каля 3 000 ягоных работнікаў таксама сталіся ахвярай цяперашняй сацыяльна-эканамічнай палітыкі.

Як паведамляе Радыё Свабода, прадстаўнікі адміністрацыі неафіцыйна паведамілі рабочым "Калібру", што няма замоваў на іхную прадукцыю, а працаваць на склад няма сэнсу. Што да афіцыйных тлумачэньняў, то, паводле словаў намесьніка дырэктара Рыгора Клімка, цяперашнюю сытуацыю на "Калібры" справакавалі наступныя акалічнасьці: "Прычынаў тут шмат. Ёсьць у нас праблемы са збытам прадукцыі, ёсьць праблемы з расейскім рынкам, ёсьць праблемы, зьвязаныя з адсутнасьцю абаротных сродкаў. І нават лета ўплывае на эканамічны стан заводу. Таму мы й вырашылі перавесьці некаторыя падразьдзяленьні прадпрыемства на скарочаны рэжым з аплатай працы работнікаў у адпаведнасьці з Працоўным кодэксам".

Што да скарачэньня вытворчасьці на "БелВАРе", то старшыня прафсаюзнага камітэту аб`яднаньня Надзея Маслоўская лічыць, што "прычына ня ў нейкім канкрэтным кіраўніку, які ня здольны кіраваць. Бо калі б так было, то крытычны стан быў бы на адным ці некалькіх прадпрыемствах, а то паўсюль развал".

"Мы, напрыклад, канвэрсыйнае прадпрыемства, ад якога патрабуюць выпуску канкурэнтаздольнай прадукцыі. Але ж як можна ствараць яе без інвэстыцыяў?! Мы выпускалі мясарубкі, электратавары, якія зараз купляюць усё радзей, бо сёньня ў людзей няма грошай на харчы, таму хіба яны могуць купляць тое, што выпускаюць прамысловыя прадпрыемствы?". Паводле словаў Маслоўскай, аб`яднаньне на 4-дзённы працоўны тыдзень пераведзенае да 1 жніўня, але ня выключана, што гэты тэрмін можа быць падоўжаны.