Журналіст сядае ў турму за спробу выкананьня прафесыйнага абавязку :: Хартыя'97 :: Навiны

Лаўрэат Нацыянальнай прэміі за абарону правоў чалавека, дэпутат Вярхоўнага Cавету 13-га скліканьня журналіст Валеры Шчукін сядае ў турму. З сёньняшняга дня ўступае ў сілу пастанова аб арышце тэрмінам на тры месяцы, што было вынесена 15 сакавіка судом Цэнтральнага раёну Менску. 60-гадовага Шчукіна абвінавацілі ў хуліганстве – парушэньні арт.339 ч.1 КК РБ толькі за тое, што ён спрабаваў увайсьці на прэсавую канферэнцыю міністра ўнутраных справаў Беларусі Ўладзімера Навумава.

Прэсавая канферэнцыя аб ходзе расьсьледаваньня “гучных справаў” пра зьнікненьні вядомых на Беларусі людзей праводзілася ў рэжымным памяшканьні МУС. Журналістаў у будынак прапускалі па зацьверджаных сьпісах. За некалькі гадзінаў да пачатку прэсавай канферэнцыі Шчукін спрабаваў трапіць у гэтыя сьпісы, аднак яму адмовілі. Адмова была матывавана тым, што сьпісы запрошаных журналістаў ужо складзены. Як высьветлілася, інфармацыя пра прэсавую канферэнцыю напярэдадні была разаслана ў інфармацыйныя агенцтвы й дзяржаўныя СМІ, а таксама ў карпункты расейскіх тэлеканалаў ГРТ, РТР і НТБ.

Шчукін спрабаваў прайсьці на мерапрыемства па пасьведчаньні члена БАЖ, аднак тры міліцыянты перашкодзілі яму. Яны схапілі Шчукіна. Павалілі яго на падлогу. Журналіст пры гэтым выпадкова разьбіў нагой шкляныя дзьверы і быў паранены асколкам шкла.

15 сакавіка ў судзе Цэнтральнага раёну Менску прайшло судовае разьбіралькніцтва адносна Валеры Шчукіна. Напрацягу трох месяцаў дэпутат спрабаваў абскардзіць рашэньне Цэнтральнага суда ў вышэйшых судовых інстанцыях. Аднак хадайніцтва Валеры Шчукіна было адхілена.

Сёньня ў 11.00 Валеры Шчукін павінен зьявіцца ў РАУС Фрунзенскага раёну Менску. Адкуль яго мусяць адправіць у СІЗА.