Беларускі лідэр ужо пасьпеў парушыць Выбарчы кодэкс :: Хартыя'97 :: Навiны

Падача Аляксандрам Лукашэнкам заявы аб рэгістрацыі ягонай групы можа быць анулявана з-за грубага парушэньня закону: раніцай 14 чэрвнея, падчас наведаваньня Цэнтрвыбаркаму, у памяшканьні ЦВК не дапусьцілі незалежных журналістаў. Паміж тым, па словах сакратара ЦВК Мікалая Лазавіка, старшыня Лідзія Ярмошына запэўніла прэзыдэнта ў тым, што камісія будзе дзейнічаць строга ў рамках дзейнага заканадаўства й Канстытуцыі Рэспублікі Беларусь.

Выбарчы кодэкс Беларусі ўтрымлівае норму свабоднага доступу для ўсіх журналістаў у любую выбарчую камісію. У афіцыйных газэтах апублікавана пастанова ЦВК, дзе гаворыцца: “Прадстаўнікі сродкаў масавай інфармацыі пры асьвятленьні падрыхтоўкі й правядзеньня выбараў прэзыдэнта Рэспублікі Беларусь маюць права прысутнічаць на паседжаньнях камісіяў пры прад’яўленьні дакумэнта, які сьведчыць пра іхні статус”. На прэсавай канферэнцыі 13 чэрвеня глава ЦВК Л.Ярмошына падцьвердзіла, што гэтая норма адносіцца й да Цэнтральнай камісыі.

Раніцай 14 чэрвеня ахова А.Лукашэнкі не пусьціла ў памяшканьне ЦВК журналістку незалежнай газэты “Нардная воля” Ганну Соусь. Ёй сказалі, што яе няма ў прэзыдэнцкіх сьпісах. Прэсавы сакратар ЦВК Валеры Юрэвіч адмовіўся камэнтаваць інцыдэнт і пераадрэсаваў пытаньні да прэсавай службы прэзыдэнта.

Агенцтву “Ю.С.Ньюс” стала вядома, што на падставе гэтага факта некалькі прэтэндэнтаў на пост прэзыдэнта на паседжаньні Цэнтрвыбаркаме ў пятніцу патрабуюць адмовіць у рэгістрацыі ініцыятыўнай групе А.Лукашэнкі ў сувязі з грубым парушэньнем ім Выбарчага кодэксу пры падачы дакумэнтаў у ЦВК.