Міліцыя парушыла закон :: Хартыя'97 :: Навiны

Бяспрэцэндэнтны па сваёй нахабнасьці й неправамоцнасьці выпадак уціску на актывістаў моладзевага руху ЗУБР адбыўся ў Менску. У студэнцкі інтэрнат №4 пра Беларускім дзяржаўным тэхналягічным універсытэце ўварваліся маёр Ленінскага РУУС Міськевіч, трое невядомых мужчынаў у штацкім, адміністрацыя інтэрнату і пачалі дошук у пакоі, дзе пражывалі “зубры”.

Няпрошаныя візытэры ўсё перавярнулі і канфіскавалі ў студэнтаў факультэту тэхналёгіі арганічных рэчываў Зьміцера Галавіна, Аляксандра Каховіча й Васіля Жакава 4 тысячы налепак ЗУБРа “Час выбіраць!” Пры гэтым прадстаўнікі ўлады, якія дзейнічалі як звычайныя рабаўнікі, не паклапаціліся выдаць хлопцам копіі канфіскацыі налепак. Нават не павыбачаўшыся, яны сыйшлі ... ашукваць іншыя пакоі. Такім самым нахабным чынам яны перавярнулі яшчэ два пакоі. У адным было знойдзена ўсяго тры дзесяткі налепак, у другім – нічога.

Пры гэтым пра тое, наколькі правамоцна дзейнічалі як міліцыя і адміністрацыя інтэрнату, так і невядомыя людзі ў штацкім, якія нават не прадставіліся, размова ня йдзе. Хаця парушэньне відавочна: на якой падставе чужыя людзі ўрываюцца ў студэнцкі пакой і ўчыняюць вобыск, не маючы на тое ордэр? І на якой падставе канфіскоўваюцца налепкі, калі ніхто зь іхніх уладальнікаў не быў “застуканы” у час іх распаўсюду? А як жа прэзумпцыя невінаватасьці? Ці ўжо само захоўваньне яркіх якасных налепак ЗУБРа стала супрацьзаконным?