Былыя супрацоўнікі пракуратуры Петрушкевіч і Случак знаходзяцца ў ЗША :: Хартыя'97 :: Навiны

Былыя супрацоўнікі пракуратуры Зьміцер Петрушкевіч й Алег Случак атрымалі палітычны прытулак у Злучаных Штатах Амерыкі. Пра гэта карэспандэнту БелаПАН паведаміў прэзыдэнт грамадзкага аб`яднаньня "Прававая дапамога насельніцтву" Алег Волчак. Паводле ягоных словаў, яны ўжо некалькі дзён знаходзяцца ў ЗША і 21 чэрвеня па аднаму з найбуйных тэлевізійных каналаў краіны будзе паказана інтэрвію зь імі.

Нагадаем, што 10 чэрвеня ў беларускія сродкі масавай інфармацыі было накіравана інтэрвію Петрушкевіча й Случака. У ім яны расказалі аб расьсьледаваньні "гучных" крымінальных справаў. Такіх, як зьнікненьне аператара ГРТ Зьміцера Завадзкага, у якім падазраецца група былога афіцэра спецпадразьдзяленьня "Алмаз" Валеры Ігнатовіча. Яны заявілі аб датычнасьці шэрагу буйных чыноўнікаў і кіраўнікоў сілавых структураў Беларусі да гэтага злачынства, а таксама да выкраданьня лідэраў апазыцыі Юры Захаранкі, Віктара Ганчара, бізнэсмэна Анатоля Красоўскага й шэрагу іншых цяжкіх злачынстваў. Праз некалькі дзён, таксама па электроннай пошце, былі распаўсюджаны копіі асобных дакумэнтаў са справы аб зьнікненьні Зьміцера Завадзкага.

Амбасада ЗША ў Рэспубліцы Беларусь ніяк не пракамэнтавала паведамленьні аб прадастаўленьні Зьміцеру Петрушкевічу і Алегу Случаку палітычнага прытулку.