Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Рашэньне аб узбуджэньні справы аб незаконных дзеяньнях Нацыянальнай дзяржаўнай тэлерадыёкампаніі прыняў 21 чэрвеня Вышэйшы гаспадарчы суд Беларусі. ВГС прыняў рашэньне аб узбуджэньні справы аб незаконных дзеяньнях Нацыянальнай дзяржаўнай тэлекампаніі па зыску ТАА “Відэё Інтэрнэшнл”, якая займаецца разьмяшчэньнем рэклямы на тэлеканале НТБ у Беларусі.
Аляксандар Лукашэнка мае намер пасьля прэзыдэнцкіх выбараў "решить вопрос" пра лёс акрэдытаваных у рэспубліцы расейскіх СМІ. Як заявіў журналістам Аляксандар Лукашэнка перад вылетам з Масквы, ён незадаволены тым, у якой танальнасьці гаворыцца ў расейскіх СМІ пра Беларусь і яе прэзыдэнта, а таксама аб перадвыбарчай кампаніі ў рэспубліцы.
Работнікі Дзяржаўтаінспекцыі маюць права прадпрымаць затрыманьне й прымусовую адбуксоўку транспартнага сродка, калі вадзіцель учыніў адміністратыўнае правапарушэньне. Праэкт закону "Аб унясеньні зьменаў у Кодэкс Рэспублікі Беларусь "Аб адміністрацыйных правапарушэньнях", якія датычацца прымусовай адбуксоўкі транспартных сродкаў" прыняла ўчора на другім чытаньні «палата прадстаўнікоў”.
Фінансавай крызай для ВА “Беларусьнафта” апынулася запазычанасьць спажыўцоў за адгружаны звадкаваны газ і нафтапрадукты. Упершыню за апошнія гады аб’яднаньне знаходзіцца на картатэцы. Пра гэта гаворыцца ў лісьце, накіраваным кіраўніцтвам аб’яднаньня ў канцэрн “Белтопгаз”, які вінен каля 3 мільярдаў рублёў.
У Гарадзенскай вобласьці на 19 чэрвеня запазычанасьць па заробку cклала 1220 мільёнаў. Амаль столькі ж, колькі ва ўсіх астаніх вабласьцях разам узятых – такія вынікі праверкі абласнога камітэту дзяржкантролю. Самыя вялікія пазыкі ў сельскай гаспадарцы – каля 1 мільярда. Між тым пазыка сельскай гаспадарцы Гарадзеншчыны складае болей за 8 мільярдаў рублёў. Зь іх 1,162 мільярды – вінны бюджэтныя арганізацыі: дзіцячыя сады, школы, турмы. Сярод буйных даўжнікоў сельскай гаспадаркі – гандаль, спажывецкая кааперацыя, аб’яднаньне хлебапрадуктаў.
Прадстаўнікі ўсіх фракцыяў літоўскага парлямэнту, 71 дэпутат, падпісалі заяву, у якой яны выказалі пратэст супраць перасьледу дэмакратычнай апазыцыі ў Беларусі. Літоўскія парлямэнтарыі выказалі занепакоенасьць тым, што да гэтага часу няма ніякай інфармацыі пра зьніклых у 1999 годзе дзеячах апазыцыі Віктара Ганчара й Юры Захаранку.
Пра пачатак кампаніі па збору подпісаў у сваю падтрымку аб’явіў лідэр аб’яднаньня “Рэгіянальная Беларусь” і патэнцыйны кандыдат на пост прэзыдэнта, які ўваходзіць у склад “пяцёркі” дэмакратычных кандыдатаў, Сямён Домаш. На прэсавай канферэнцыі, што адбыылася сёньня ў Менску, Сямён Домаш прадаставіў журналістам прадстаўнікоў сваёй каманды. У іхні шэраг увайшлі дэпутат Вярхоўнага савету 13-га скліканьня й былы палітвязень Уладзімер Кудзінаў, намесьнік старшыні Аб’яднанай Грамадзянскай партыі Аляксандар Дабравольскі, жонка памерлага пры дзіўных абставінах палітыка Генадзя Карпенкі Людміла Карпенка й вядомы рэжысёр-дакументаліст, аўтар нашумелага “Звычайнага прэзыдэнта” Юры Хашчавацкі.
Учора ў Маскву прыбыў прэзыдэнт Беларусі Аляксандар Лукашэнка. Падстава для візыту – нейкія праблемы саюзнай дзяржавы Расеі й Беларусі. Хацелася ж спадару Лукашэнку запэўніцца, што расейскія ўлады па-ранейшаму лічаць яго сваім кандыдатам на выбарах у Беларусі. Але беларускага прэзыдэнта чакала горкае расчараваньне.
Збор подпісаў у падтрымку 22 патэнцыйных кандыдатаў у прэзыдэнты пачалі сёньня іхнія ініцыятыўныя групы. На гэтым этапе барацьбу за прэзыдэнцкае крэсла будуць весьці: лідэр арганізацыі “Рэгіянальная Беларусь” Сямён Домаш (3 753); лідэр Партыі камуністаў Беларускай Сяргей Калякін (2 076); лідэр Федэрацыі прафсаюзаў Беларускай Уладзімер Ганчарык (4 054); былы міністар абароны Беларусі Павал Казлоўскі (1 609); былы прэм’ер-міністар Беларусі Міхаіл Чыгір (1 485).
У Беларусі мясцовае тэлебачаньне сарвала прамы эфір з удзелам кандыдата ў прэзыдэнты, былога намесьніка ўраду рэспублікі Леаніда Сініцына. Прамы эфір павінен быў адбыцца на канале НТБ.
Савет Беларускага прафсаюзу работнікаў аўтамабільнага й сельскагаспадарчага машынабудаваньня “катэгарычна пратэстуе супраць дзеяньняў кіраўніцтва рэспублікі адносна прамысловых прадпрыемстваў”. Як сьцьвярджаецца ў заяве, “кіраўнікі прадпрыемстваў сталі закладнікамі сёньняшняга палітычнага рэжыму”. У якасьці прыкладу прыводзіцца сытуацыя на менскім ТАА “БАТЭ”, якое са стабільнага прадпрыемства з высокім заробкам у 1997-1998 гадах ператварылася у “неплацездольнага даўжніка”. Прычына гэтаму, як сьцьвярджае прафсаюз, стала сытуацыя, створаная ўладамі вакол БАТЭ толькі з адной мэтай – “пазбавіцца ад кіраўніка ТАА Мікалая Берсела, дэпутата Вярхоўнага Савету Беларусі 13-га скліканьня, які адкрыта выступае супраць неразумнай эканамічнай палітыкі ўладаў”.
Акрэдытаваныя ў Менску дыпляматы краінаў Бальтыі, хутчэй за ўсё, праігнаруюць запрашэньне на ваенны парад 3 ліпеня ў гонар Дня рэспублікі. Прычына – камандаваць парадам будзе намесьнік міністра абароны Ўладзімер Усхопчык, які ў студзені 1991 года ўзначальваў савецкі гарнізон у Вільнюсе, дзе пры штурме тэлецэнтру загінулі мірныя жыхары.
Учора Міхаіл Касьянаў сустракаўся з Аляксандрам Лукашэнкам адзін на адзін. Як паведаміў прэсавы сакратар прэзыдэнта Беларусі Мікалай Барысевіч, казалі пра энэргетычнае супрацоўніцтва, перш за ўсё пра “Газпрам”. Міхаіл Касьянаў пераконваў Аляксандра Лукашэнку не замінаць будаўніцтву газапровадаў з Расеі ў Заходнюю Эўропу. Той адказваў ў тым духу, што Беларусь і так зацікаўлена з гэтым будаўніцтве. Але гэты інтарэс будзе яшчэ больш моцным, калі Расея павялічыць стаўкі газу ў Беларусь з 16 млрд. да 20 млрд куб. м. у год. Прэм’ер абяцаў падумаць.
Новаполацкае ВА “Нафтан” з пачатку чэрвеня перапрацавала 373 тысячы тонаў вуглевадароднай сыравіны ці 94 адсоткі да аналягічнага перыяду чэрвеня мінулага года. Першасная перапрацоўка нафты на “Нафтане” з пачатку года скарацілася на 5 адсоткаў і склала 3.166 тысячаў тонаў. Пры гэтым пастаўкі нафты склалі 3 154 тысячы тонаў, ці 94 адсоткі да аналягічнага перыяду мінулага года.
, iнформэр
