Пачаўся збор подпісаў у падтрымку кандыдатаў у прэзыдэнты :: Хартыя'97 :: Навiны

Збор подпісаў у падтрымку 22 патэнцыйных кандыдатаў у прэзыдэнты пачалі сёньня іхнія ініцыятыўныя групы. На гэтым этапе барацьбу за прэзыдэнцкае крэсла будуць весьці: лідэр арганізацыі “Рэгіянальная Беларусь” Сямён Домаш (3 753); лідэр Партыі камуністаў Беларускай Сяргей Калякін (2 076); лідэр Федэрацыі прафсаюзаў Беларускай Уладзімер Ганчарык (4 054); былы міністар абароны Беларусі Павал Казлоўскі (1 609); былы прэм’ер-міністар Беларусі Міхаіл Чыгір (1 485).

Былы віцэ-прэм’ер ураду Леанід Сініцын (1 973); дырэктар Міжнароднага інстытуту мэнэджмэнту, дэпутат Вярхоўнага Савету Беларусі 13-га скліканьня Віктар Цярэшчанка (у ягонай ініцыятыўнай групе - 6 069 чалавек); лідэр Ліберальна-дэмакратычнай партыі й блёку “Новая Беларусь – Адзінства” Сяргей Гайдукевіч (2 136); віцэ-прэзыдэнт міжнароднай асацыяцыі “Абарона правоў ччалавека” Мікалай Мекека (135); дзейны прэзыдэнт Аляксандар Лукашэнка (3 830); лідэр Кансэрватыўна-хрысьціянскай партыі - БНФ Зянон Пазьняк (1 429); лідэр незарэгістраванай арганізацыі “рабочая самапомач” Сяргей Антончык (1 155); Надзвычайны і Паўнамоцны Пасол Беларусі ў Латвіі, Эстоніі і Фінляндыі па сумяшчальніцтву Міхаіл Марыніч (806 чалавек); старшыня рэспубліканскага камітэту Беларускага прафсаюзу работнікаў аграпрамысловага коплексу Аляксандар Ярашук (1 209); інжынэр электроннай тэхнікі, юрыст, часова беспрацоўны Канстанцін Канановіч (142); генэральны дырэктар ЗАТ "Атлант" Леанід Калугін (120); прадпрымальнік, афіцэр запасу КДБ Валянцін Семак (300); дэпутат Палаты прадстаўнікоў, дачка былога першага сакратара Цк КПБ Петра Машэрава Наталя Машэрава (1 281); старшыня стачкаму прадпрымальнікаў Валеры Леванеўскі (356); галоўны рэжысэр Тэатра сатыры й гумару "Хрыстафор" Язген Крыжаноўскі (134); дэпутат Мінгарсавету, прадпрымальнік Юры Данькоў (244); дэпутат Палаты прадстаўнікоў, кіраўнік ЗАТ “Гандлёвы Дом БелБабаеўскае” Сяргей Скрабец (170).