Беларусьнафта” ў крызе з-за праблемы неплацяжоў :: Хартыя'97 :: Навiны

Фінансавай крызай для ВА “Беларусьнафта” апынулася запазычанасьць спажыўцоў за адгружаны звадкаваны газ і нафтапрадукты. Упершыню за апошнія гады аб’яднаньне знаходзіцца на картатэцы. Пра гэта гаворыцца ў лісьце, накіраваным кіраўніцтвам аб’яднаньня ў канцэрн “Белтопгаз”, які вінен каля 3 мільярдаў рублёў.

Як стала вядома, канцэрн не аплочвае пастаўкі звадкаванага газу. Магчыма, што зацягваньне пытаньня разьлікаў вымусіць “Беларусьнафту” патрабаваць ад найбуйных даўжнікоў – “Белтопгазу” ( 3 млрд. рублей) і прадпрыемства “СГ-транс” (2,4 млрд. рублей) – пакрыцьця кошту пастаўленых рэсурсаў і ўплаты штрафных санкцыяў у судовым парадку. Недахоп зваротных сродкаў, які склаўся па віне спажыўцоў можа выклікаць зьмяншэньне аб’ёмаў закупак сыравіны, неабходнай газаперапрацоўчаму заводу ў Рэчыцы. Для таго каб выправіць фінансавае становішча аб’яднаньня, кіраўніцтва “Беларусьнафты” зьвярнулася да канцэрну “Белнафтахім” з просьбаю -- дазволіць экспарт 3000 тонаў звадкаванага газу, што выпрацоўваецца з рэфлюксу, а таксама са спадарожнага нафтавага газу й нафты, якія могуць быць аплочаны. Па папярэдняй інфармацыі, працэдура атрыманьня дадзенага дазволу ўскладенена тым, што ў адзіным паліўным балансе саюзнай дзяржавы не прадугледжаны экспарт звадкаванага газу. Аднак ёсць падставы меркаваць, што ў хуткім часе такі дазвол усё ж такі будзе атрыманы.