Павал Казлоўскі: “Армія прагаласуе супраць Лукашэнкі” :: Хартыя'97 :: Навiны

“Армія прагаласуе супраць Лукашэнкі”, - такую думку выказаў у размове з карэспандэнтам БелаПАН адзін з прэтэндэнтаў на пост главы дзяржавы, былы міністар абароны Беларусі генэрал-палкоўнік Павал Казлоўскі. Ён прыбыў 22 чэрвеня ў Брэст на мерапрыемствы з нагоды 60-годзьдзя пачатку Вялікай Айчыннай вайны.

Па словах Паўла Казлоўскага, раней “75 адсоткаў сродкаў, атрыманых ад рэалізіцыі ўзбраеньняў, ішлі ў бюджэт Мінабароны”. “За гэтыя 75 адсоткаў, сказаў экс-міністар, Мінабароны давала справаздачу перад Мінфінам. За іх будавалася жыльлё, павышалася боездольнасьць арміі. Зараз продаж зброі – адзін з галоўных крыніцаў так званага прэзыдэнцкага фонду. Гэтыя сродкі прыкладна раўняюцца дзяржбюджэту. З гэтага фонду армія не атрымоўвае ні капейкі. Ці зарэгістраваны гэты фонд і ці дае ён справаздачу па падатках – невядома”.

Па словах Паўла Казлоўскага, такое становішча выклікае незадаволенасьць у арміі, а “лётчыкі і камандзіры частак адкрыта абураюцца”. Таму, лічыць Казлоўскі, “пры галасаваньні на адкрытых участках ваенныя не пойдуць на фальсыфікацыі”. Аднак ён дапускае, што парушэньні адбудуцца пры галасаваньні на закрытых вучастках. Акрамя таго, лічыць Павал Еазлоўскі, “Лукашэнка ня здолее аб’ектыўна запоўніць падаткавую дэклярацыю; яна будзе фальшывай”.