Лукашэнка ня мае сілы: за яго ня хочуць галасаваць :: Хартыя'97 :: Навiны

Падчас цырымоніі адкрыцьця ліцэя БДУ, А.Р. Лукашэнка выказаў кіраўніцтву ўнівэрсытэту сур’ёзныя прэтэнзыі ў тым, што толькі каля 4% студэнтаў БДУ гатовыя падтрымаць яго на надыходзячых выбарах і што гэта зьвязана з тым, што многія выкладчыкі прыніжаныя сваім гаротным заробкам, на занятках адкрыта выказваюць сваю незадаволенасьць, і тым самым агітуюць студэнтаў супраць дзейнай улады. Пра гэта з дакладных крыніцаў стала вядома ініцыятыўнай групе па вылучэньню Міхаіла Чыгіра кандыдатам у прэзыдэнты.

Пасьля гэтага рэктар БДУ А.В.Казулін учыніў “разнос” сваім падначаленым, якія будуць адказваць за выбарчую кампанію, патрабуючы ад іх, каб 100% студэнтаў БДУ прагаласавала за А.Г.Лукашэнку. На нясьмелае пытаньне, як гэтага дасягнуць, быў адказ ,што ў іх для гэтага будзе апошняя ноч.

У сувязі з гэтым прэсавая служба ініцыятыўнай групы грамадзянаў па вылучэньню М.Чыгіра кандыдатам у прэзыдэнты РБ зьвярнулася ў Цэнтральную выбарчую камісію з просьбаю яшчэ раз нагадаць старанным адміністратарам, што тэрміна даўнасьці для прыцягненьня да крымінальнай адказнасьці за парушэньні выбарчага заканадаўства не існуе.

А для асобаў, якія будуць задзейнічаны ў выбарчым працэсе, кіраўнікоў прадпрыемстваў і асабліва для членаў выбарчых камісіяў, параіла наступнае: у выніку ціска на іх з боку падстаўнікоў “вертыкалі”, яны маюць права патрабаваць пісьмовых указаў і распараджэньняў. Як паказвае практыка, ніхто такіх пісьмовых указаў не дае. Такім чынам, можна абараніць сябе ад супрацьпраўных дзеяньняў старанных адміністратараў.

Але не далёка усё гэты ведаюць. Ліст нашага чытача стала падцьверджаньнем гэтага: “Цікавы факт: сёньня, 22.06.01 у цэнтральным апараце ТАА “БелПрамБудБанк” начальнік адзьдзелу кадраў Цыбулька К.В. выклікае работнікаў банку па адным да сябе ў кабінет і “прапаноўвае” паставіць подпісы для ініцыятыўнай групы “бацькі”. І паспрабуй яны не паставіць...”.

Але і ёсьць іншы варыянт разьвіцьця падзеяў. Па словах членаў ініцыятыўных групаў дэмакратычных кандыдатаў, яны не раз былі сьведкамі таго, як іхніх “калегаў”, якія зьбіралі подпісы за вылучэньне Лукашэнкі, з многіх кватэраў літаральна скатвалі па лесьвіцы ці ў лепшым выпадку захлопвалі перад носам дзьверы.