Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Заплянаваная на 27 чэрвеня сустрэча старшыні Цэнтрвыбаркаму Лідзіі Ярмошынай з кіраўніком Кансультатыўна-назіральнае групы АБСЭ Хансам-Георгам Вікам сарвана. Глава ЦВК аддала перавагу нейкаму сэмінару ў Брэсьце, а не сустрэчы з амабасадарам, распавесьці пра гэта ў ЦВК адмовіліся. Адначасова ў КНГ АБСЭ паведамілі, што беларускі бок да гэтага часу не накіраваў запрашэньне міжнародным назіральнікам для ўдзелу ў прэзыдэнцкіх выбарах. Гэта запрашэньне не трапіла ні ў адрэс КНГ АБСЭ, ні дзейнаму старшыні АБСЭ.
Узьніклі праблемы з выдачай уязных візаў у Беларусь прадстаўнікам Парлямэнцкай Асамблеі АБСЭ. У беларускім МЗСе падцьвердзілі, што пытаньне аб прадастаўленьні візаў членам Парлямэнцкай Асамблеі АБСЭ Уце Цапф і Урбану Аліну пакуль знаходзіцца толькі на разглядзе. Нягледзячы на тое, што іхні візыт пачынаецца пасьлязаўтра, да сёньня ня ўзгоднена праграма знаходжаньня гэтай дэлегацыі ў Беларусі. Дэлегацыя ПА АБСЭ павінна падрыхтаваць справаздачу аб сытуацыі ў Беларусі, на падставе якой будзе вырашацца пытаньне аб тым, хто будзе членам Парлямэнцкай Асамблеі АБСЭ: Вярхоўны Савет 13-га скліканьня ці “палата прадстаўнікоў”.
“Вы памятаеце, колькі наабяцаў нам Лукашэнка, калі 7 гадоў таму выбіраўся у прэзыдэнты? Шмат, вельмі шмат. Але сёньня, калі ягоны час падыходзіць да канца, мы бачым толькі глыбокую эканамічную крызу, агалечаных людзей і танны папулізм “народнага выбраньніка”, што так жорстка падмануў нас. Нашыя дзеці варты лепшага жыцьця. Мы не маем права пазбаўляць іх шансу нармальна жыць. Мы павінны пазбавіць нашыя сем’і ад галечы, даць сваім дзецям і бацькам дастатак і дабрабыт”, - такімі словамі пачынаюцца ўлёткі, што распаўсюджваюцца па гарадах і вёсках Менскай вобласьці актывістамі руху ЗУБР.
Кожны прэтэндэнт на высокі дзяржаўны пост у Беларусі павінен прад’явіць дэклярацыю аб даходах. Гэта павінны зрабіць, згодна апублікаванаму дэкрэту Аляксандра Лукашэнка, і ягоныя блізкія сваякі. У іхняю колькасьць уключаны жонка (муж) й ейныя (ягоныя) бацькі, а таксама дзеці, родныя браты й сёстры, дзед, бабка, унукі. За прадастаўленьне недакладнай інфармацыі Цэнтральная камісія па выбарах і правядзеньню рэспубліканскіх рэферэндумаў зараз мае права адмовіць у рэгістрацыі кандыдата ў прэзыдэнты рэспублікі. Ці адмяніць гэтую рэгістрацыю, калі яна ўжо прайшла, і раскрыліся новыя факты.
Падчас візыту патрыярха Маскоўскага і Усея Русі Аляксія ІІ шэраг супрацоўнікаў КДБ, у тым ліку старшыня КДБ Беларусі Леанід Ерын, атрымалі ўзнагароды Рускай праваслаўнай царквы. Леанід Ерын узнагароджаны ордэнам Роўнаапостальскага князя Ўладзімера ІІІ ступені. Узнагароды ўручаны за тое, што Ерын “з большай павагай і акуратнасьцю рэалізоўваў волю беларускага ўраду ва ўзмацненьні духоўных асноваў грамадзтва”.
Міністэрства фінансаў Расеі падцьвердзіла сваю гатоўнасьць выдаць Беларусі дзяржаўны крэдыт пасьля ўрэгуляваньня рэспублікай пытаньняў пагашэньня пытаньняў мінулай пазыкі. Размова йдзе аб другой траншы ў памеры 70 мільёнаў даляраў ЗША. Першая транша ў памеры 30 мільёнаў даляраў залічана расейскім бокам у кошт пагашэньня папярэдніх беларускіх пазыкаў.
У адным з цэхаў Святлагорскага прадпрыемства “Хімвалакно” рабочыя не прыступілі да працы, патрабуючы пагашэньня запазычанасьці па заробку. На гэты раз канфлікт урэгулявалі. Аднак цяжкае фінансавае становішча, якое склалася на прадпрыемстве, не выключае таго, што ў будучым можа адбыцца сацыяльны выбух. Сёньня тут яшчэ ня выплацілі цалкам так званы спажывецкі кошык.
Спружына сюжэту, зьвязанага са зьнікненьнем у Беларусі вядомых палітычных і грамадзкіх дзеячаў, працягвае сціскацца. Але калі яна стане роўнай, наступствы могуць зьнесьці са сваіх пастоў шматлікіх высокіх чыноўнікаў, аж да главы дзяржавы. Выкрываньні, зробленыя сьледчымі пракуратуры Зьміцерам Петрушкевічам й Алегам Случакам, якія заявілі пра існаваньне ў Беларусі атрада, які складаецца з супрацоўнікаў спэцпадразьдзяленьняў, што па загаду высокага кіраўніцтва краіны займаўся ліквідацыяй палітычных апанентаў Аляксандра Лукашэнкі, падмацаваў іхні былы калега, а зараз праваабаронца Алег Волчак.
Адкрыты ліст да Аляксандра Лукашэнкі ад жонкі былога кіраўніка справамі Адміністрацыі прэзыдэнта Івана Ціцянкова атрымала рэдакцыя “Белорусской деловой газеты” 26 чэрвеня па факсу. Зь ліста вынікае, што Галіне Ціцянковай паведамілі, што Лукашэнка даў загад Генэральнаму пракурору Беларусі Віктару Шэйману: “Если не можете разобраться с Титенковым, то у него есть дети и семья, а если не знаете, где они живут, - спросите у меня”. Як піша Галіна Ціцянкова,”Генпракурор прыняў загад да выкананьня”.
10 палітычных партыяў Беларусі, што ўваходзяць у Міжпартыйны цэнтар, прынялі ўчора вечарам мемарандум, у якім заклікалі ўлады распусьціць тэрытарыяльныя выбарчыя камісіі на той падставе, што яны сфармаваны незаконна. Міжпартыйны цэнтар зрабіў выснову, што сыстэма выбарчых камісіяў, якая склалася ў Беларусі, супярэчыць ня толькі беларускаму, але й міжнароднаму заканадаўству. Гэтая сыстэма дае вялікія перавагі Лукашэнке й выключае свабодныя й дэмакратычныя выбары.
Выключную актыўнасьць ў справе збору подпісаў за Лукашэнку разьвярнулі ў Віцебску адміністратары ўсіх узроўняў. Людзей пад страхам звальненьня прымушаюць падпісвацца за Лукашэнку адразу на працоўных месцах. Так здарылася, напрыклад, у 3-м гарадзкім шпіталі Віцебску і ў абласным анкалягічным шпіталі, у 73-м дзіцячым садку, дзе намесьніца – дэлегат Усебеларускага сходу, на прадпрыемствах “КІМ” і “Віцязь”, паведамляе радыё “Рыцыя”.
У Брэсцкай вобласьці адзначаюцца выпадкі перашкоды працы ініцыятыўнай групы, якая зьбірае подпісы ў падтрымку Сямёна Домаша. Як паведаміла БелаПАН каардынатар грамадзянскай ініцыятывы па незалежным назіраньні ў Брэскай вобласьці Іна Апанасенка, 22 чэрвеня ў Століне трапіла пад вобыск кватэра Дзяніса Марчанка, дзе знаходзіцца штаб ініцыятыўнай групы па збору подпісаў за Домаша. Супрацоўнікі міліцыі канфіскавалі кампутар, прынтар, факс-мадэм, дыскеты, а таксама сьпісы ініцыятыўнай групы Домаша па Столінскім раёне і інструкцыі па збору попісаў.
“Так, я быў сярод актыўных прыхільнікаў Лукашэнкі, як і многія сумленныя й прыстойныя людзі, якія паверылі ў яго. Напачатку праца гэтай каманды абнадзейвала й меркавалася, што будзе перспэктыўнай для беларускага народа. Аднак вельмі хутка я, як і Юры Захаранка, Віктар Ганчар, Васіль Капітан, зразумеў цынізм новай улады, ейную непавагу да ўласнага народа, мовы, гісторыі. Пабачыў імкненьне блізкага акружэньня прэзыдэнта да хуткага абагачэньня, уціску ўсялякага іншадумства”, - заявіў у інтэрвію газэце “День” былы намесьнік дзяржсакратара Савета Бясьпекі Беларусі генэрал Валеры Кез. Тэкст інтэрвію цалкам чытайце на нашым сайце.
Дэлегацыя Парлямэнцкай Асамблеі АБСЭ прыязджае ў Менск 30 чэрвеня. На падставе падрыхтаванай падчас візыту справаздачы будзе вырашацца пытанне аб тым, хто будзе членам Парлямэнцкай Асамблеі АБСЭ: Вярхоўны Савет 13-га скліканьня ці “палата прадстаўнікоў”. Пасьля на сэсіі Парлямэнцкай Асамблеі АБСЭ, якая пройдзе ў пачатку ліпеня ў Парыжы, будзе канчаткова вырашана пытаньне пра лёс беларускай дэлегацыі.
Цэнтральны камітэт Беларускага прафсаюзу работнікаў адукацыі й навукі зьвярнуўся да прэм’ер-міністра краіны з патрабаваньнем прыняць меры па ліквідацыі ўсёй запазычанасьці работнікам адукацыі. У супраціўным выпадку настаўнікі маюць намер скарыстаць законнае права пераносу адпачынку да моманту выплаты адпускных цалкам, што створыць пагрозу арганізаванаму пачатку навучальнага года.
У Беларусі падаражэлі нафтапрадукты. Зараз кошт бензіну АІ-76 складае 460 рублёў за літар, А-92 – 570 рублёў, АІ-95 – 650, дызельнага паліва – 400 рублёў за літар. У канцэрне “Белнафтахім” павышэньне коштаў тлумачаць паніжэньнем курсу беларускага рубля адносна даляра ЗША.
, iнформэр
