Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Зваротам групы патэнцыйных кандыдатаў у прэзыдэнты Беларусі перадалі вышэйшым службовым асобам ПАСЭ і Савету Эўропы кіраўнік АГП Анатоль Лябедзька й ягоны намесьнік Яраслаў Раманчук, які знаходзіцца ў Стразбурзе, дзе 29 чэрвеня сканчваецца сэсія Парлямэнцкай асамблеі Савету Эўропы.
Прэсавая служба ініцыятыўнай групы Міхаіла Чыгіра паведамляе аб фактах выкарыстаньня брудных прадвыбарчых тэхналёгіяў супраць патэнцыйнага кандыдата ў прэзыдэнты. Так, 27 чэрвеня ў Нясьвіжы (Менская вобласьць) у адным з дамоў па вуліцы Карла Маркса трое маладых людзей спартовага тыпу, без пасьведчаньняў членаў ініцыятыўнай групы Міхаіла Чыгіра, прапаноўвалі жыхарам паставіць подпіс у ягоную падтрымку ў незапоўненых лістах і прапаноўвалі за гэта наяўныя грошы. Грамадзяне, якія адмаўляліся падпісвацца, падвяргаліся пагрозам і абразам.
Тры чалавекі з ініцыятыўнай групы па збору подпісаў за патэнцыйнага кандыдата ў прэзыдэнты Сямёна Домаша былі затрыманы 27 чэрвеня ў горадзе Жодзіна Менскай вобласьці ля прахадной Беларускага аўтамабільнага завода. Членаў ініцыятыўнай групы пасадзілі ў аўтамабіль і даставілі ў адзьдзяленьне міліцыі, дзе зь іх узялі тлумачэньне. Фармальнай прычынаю затрыманьня стаў плякат выстаўлены падчас збору подпісаў.
“У ва што ператварылася наша жыцьцё за апошнія сем гадоў? Рэжым Лукашэнкі давёў нас да галечы. Заробак сёньня рэгулярна атрымоўваюць толькі чыноўнікі й міліцыя. Нам, шэраговым грамадзянам, якія працуюць на заводах, фабрыках, у школах, яе стала затрымліваюць, Ня плоцяць месяцамі. А калі й плоцяць, то, як магчыма жыць на гэтыя грошы, якія ўлада абяцае павялічыць усяго да 100 даляраў?” - гэтыя пытаньні актывісты руху ЗУБР задаюць ва ўлётках, якія сёньня распаўсюджваюцца ў Гарадзенскай вобласьці.
Прыкладна на сто чалавек мяркуецца скараціць колькасьць персаналу на рэспубліканскім унітарным прапрыемстве “Жыткавіцкі мотабудаўнічы завод” (Гомельская вобласьць). Абсталяваньне гэтага канверсыўнага прадпрыемства зараз загружана толькі на 30-40 адсоткаў і, нягледзячы на тое, што прадукцыя завода карыстаецца попытам, у тым ліку на Менскім трактарным і мотарамонтным заводах, жывых грошай на прадпрыемства паступае вельмі мала. Яшчэ нядаўна дырэктар мотабудаўнічага завода Ўладзімер Воранаў, кажучы, што з 782 працоўных на прадпрыемстве можна сьмела скарачаць 200, патлумачыў, што ня можа гэтага зрабіць, бо ў Жыткавічах практычна немагчыма трапіць на іншае месца працы. Аднак, як відаць, абставіны апынуліся мацней за спачуваньне да людзей.
З 1 ліпеня мяняецца парадак уезду беларускіх грамадзянаў па службовых справах на тэрыторыю Польшчы. Польскі бок будзе прызнаваць адметкі ў пашпарце “АВ-службовая шматразовая” сапраўднымі для шматразовага ўезду на тэрыторыю Польшчы толькі да 1 ліпеня гэтага года. З 1 ліпеня прастаўленыя пашпартна-візавымі службамі МУС краіны адметкі “АВ-службовая” будуць сапраўднымі толькі для аднаразовага ўезду на тэрыторыю Польшчы.
Збор подпісаў за Аляксандра Лукашэнку пачаўся яшчэ да таго, як вызначыліся тэрытарыяльныя межы выбарчых вучасткаў. Самая неверагодная гісторыя здарылася ў псыхіятрычнай лякарні Магілёва: пацыентаў з памежнымі формамі хваробаў па загаду галоўнага доктара запісалі за Лукашэнку. Хворых – і стацыянарных, і амбулаторных – прымусілі паставіць у падпісных лістах толькі дату й подпіс, а месцам прапіскі вызначылі псыхіятрычную лякарню, паведамляе Радыё “Рацыя”.
Прэтэндэнты на пост главы дзяржавы крытычна ацэньваюць дэкрэт прэзыдэнта №20 “Аб абавязковым дэкляраваньні даходаў і маёмасьці кандыдата ў прэзыдэнты Рэспублікі Беларусь, ягоных сваякоў, жонкі (мужа), і ейных (ягоных) бацькоў і некаторых іншых мерах, накіраваных на правядзеньне адкрытых, свабодных і сумленных выбараў”. “Дэкрэт зьяўляецца яшчэ адным падцьверджаньнем таго, што Лукашэнка не ладзіць зь дзейным заканадаўствам”, - заявіў адзін з патэнцыйных прэтэндэнтаў на пост прэзыдэнта Беларусі Сямён Домаш.
“Мы не задаволены тымі ўмовамі, якія склаліся ў Беларусі для разьвіцьця бізнэсу і хацелі б бачыць фудаментальныя зьмены ў гэтай галіне, перш чым перайсьці да паўнамаштабнага фінасаваньня”, - заявіў падчас свайго візыту ў Менск дырэктар адзьдзелу Беларусі і Ўкраіны Сусьветнага Банка Люка Бабанэ. Па ягоных словах у Беларусі, у параўнаньні з іншымі краінамі сьвету (выключэньне складае толькі Паўночная Карэя), - найбольш цяжкія ўмовы для рэгістрацыі дробных і сярэдніх прадпрыемстваў.
Цэнтральная камісія Рэспублікі Беларусі па выбарах і правядзеньню рэспубліканскіх рэферэндумаў распаўсюдзіла сваё паведамленьне, у якім тлумачыць парадак збору подпісаў у падтрымку вылучэньня кандыдатаў на пост прэзыдэнта. Як адзначаецца ў дакумэнце, паведамленьне зьявілася ў сувязі са скажэньнем некаторымі СМІ адпаведных палажэньняў Выбарчага кодэксу.
Сваякі гомельскіх лётчыкаў, што зьніклі амаль тры гады таму ў раёне Шры-Ланкі, прад’явілі грамадзянскія зыскі да аэрапорту “Гомельавія”. Удава пілёта Сяргея Ласаіванова і ўдава бортмеханіка Сяргея Анопрыенка, а таксама бацькі штурмана Сяргея Казлова запатрабавалі пакрыцьця маральнай шкоды, нанесенай ім сьмерцю родных. Як паведамляе "Вечерний Гомель", адказнасьць за здарэньне ўскладаюць на кіраўніцтва “Гомельавія”, якое камандзіравала экіпаж у Шры-Ланку, не папярэдзіўшы пра баявыя дзеяньні, якія там вяліся.
Патрыярх усея Русі Аляксій ІІ скончыў свой візыт у Беларусь наведваньнем разам з Лукашэнкам так званага манументу Дружбы на мяжы Беларусі з Расеяй і Ўкраінаю. Манумент Дружбы быў выбраны месцам для перадачы Лукашэнкам двух абноўленых вялікіх урачыстых харугваў для Храма Хрыста Збаўцы ў Маскве. Харугвы, расшытыя золатам, былі зроблены па заказу Лукашэнку за 100 тысячаў даляраў у Маскве, адтуль перавезены ў Беларусь, каб зноў адправіцца ў расейскую сталіцу.
Па разьліках Міністэрства працы павелічэньне з 1 ліпеня мінімальнага заробку да 7500 рублёў дазволіць павысіць заробак бюджэтнікаў прыкладна на 24%. Насамрэч павышэньне заробку застанецца толькі на паперы. З-за сталага росту інфляцыі 40,5% насельніцтва краіны будзе мець рэсурсы на члена сям’і ніжэй за пражыткавы мінімум, што значыць жыць за рысай бядноты.
На 1 чэрвеня запасы гатовай прадукцыі на складах беларускіх прамысловых прадпрыемстваў дасягнулі 67,9 адсоткі аб сярэднемесячнага аб`ёму вытворчасьці. Для параўнаньня: у траўні запасы складалі 65,4, у красавіку - 60,3, у сакавіку - 56,1, у лютым - 52 адсоткі. Самы высокі показчык быў у студзені 1999 года (85,9 адсоткі), калі прамысловасьць перажывала наступствы расескай фінансавай крызы.
Пасьля месячнага перапынку працягваецца рост тарыфаў на жыльлёва-камунальныя паслугі для насельніцтва. У чэрвені на 3,3 адсоткі павялічылася кватэрная плата за тэхабслугоўваньне) і плата за карыстаньне ліфтам, на столькі сама падаражэлі газ, халодная вада й каналізацыя, вываз і абяскоджваньне адходаў, на 35 адсоткаў – гарачая вада.
, iнформэр
