Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Беларускі Гэльсінкскі камітэт зьвярнуўся ў Вярхоўны Суд, Вышэйшы гаспадарчы суд і Канстытуцыйны Суд з просьбай прыняць меры да прызнаньня Дэкрэта №20 неканстытуцыйным. БГК абураны тым фактам, што дэкрэт не прадугледжвае агучваньня Лукашэнкам, што йдзе на паўторнае перавыбраньне, інфармацыі пра створаныя й кантралюемыя ім пазабюджэтныя фонды Кіраваньня справамі Прэзыдэнта, што, на думку БГК, зьяўляецца абавязковым. Маёмасьць і грашовыя сродкі гэтых фондаў не зьяўляюцца часткай дзяржаўнага бюджэту. Яны выведзены з-пад кантролю “парлямэнту”, Савміну, Камітэту дзяржкантролю і падпарадкаваны выключна Лукашэнку.
Вось ужо тыдзень пошта Барысава адмаўляецца абслугоўваць незалежны штотыднёвік “Барысаўскія навіны”, што выходзіць 15-ці тысячным накладам і распаўсюджваецца па чатырох раёнах Менскай вобласьці. Як паведаміў "Рацыё Свабода" галоўны рэдактар і сузаснавальнік выданьня Анатоль Букас, кіраўніцтва Барысаўскага гарвыканкаму забараніла мясцоваму вузлу сувязі пералічваць выданню грошы чытачоў за падпіску на другое паўгодзьдзе.
Дэлегацыя Парлямэнцкай Асамблеі АБСЭ прыязджае ў Менск 30 чэрвеня. На падставе падрыхтаванай падчас візыту справаздачы гэтая дэлегацыя падрыхтуе прэкт рашэньня аб тым, хто будзе членам Парлямэнцкай Асамблеі АБСЭ: Вярхоўны Савет 13-га скліканьня ці “палата прадстаўнікоў”. Пасьля на сэсіі Парлямэнцкай Асамблеі АБСЭ, якая пройдзе ў пачатку ліпеня ў Парыжы, будзе канчаткова вырашана пытаньне пра лёс беларускай дэлегацыі.
Дэпутаты “палаты прадстаўнікоў” не саступаюць у розуме і псыхічным нездароўі свайму лідэру “Слабадана Мілошавіча судзяць за тое, што ён абараняў сваю краіну й інтарэсы ейнага народа, за тое, што ён выступаў за ўступ Югаславіі ў Саюз Беларусі й Рассеі”,-- заявіў намесьнік старшыні Пастаяннай камісіі па міжнародных справах і сувязях з СНД "Палаты прадстаўнікоў" Сяргей Касьцян.
Па дадзеных Міністэрства статыстыкі й аналізу на 1 траўня 2001 года агульная запазычанасьць беларускіх прадпрыемстваў за энэргарэсурсы склала 2.122,2 млрд. рублёў (1,59 млрд. даляраў ЗША). На 1 студзеня пазыка раўнялася 1.772,3 млрд. рублёў (1,5 млрд. даляраў ЗША). Запазычанасьць за прыродны газ склала 1.079,5 млрд. рублёў (811 млн. даляраў ЗША), электраэнэргію - 949 млрд. (713 млн.), нафту - 16,9 млрд. (12,7 млн.).
Незапатрабаванасьць айчыннага піва зьвязана з пагаршэньнем якасных характарыстык беларускага піва, што абумоўлена нізкай якасьцю півавараннага ячмяню і, як сьледзтва, нізкай якасьцю соладу. Пры гэтым трэба зазначыць, што ў Беларусі дзейнічае дзяржаўны заказ. І піўных вытворцаў проста абавязваюць закупаць узрошчаны на Беларусі півавараны ячмень, які значна саступае па якасных характарыстыках імпартным аналягам. Пры гэтым тэхнічнае становішча піўной галіны – сумнае.
Міжнародныя фінансавыя арганізацыі й краіны Захаду маюць намер прадаставіць Югаславіі значную фінансавую дапамогу для рэканструкцыі эканомікі краіны. На міжнароднай канферэнцыі ў Брусэлі, прысьвечанай гэтаму пытаньню, прадстаўнікі Сусьветнага банку паведамілі, што выдзяляюць Бялграду на бліжэйшыя два гады 580 мільёнаў даляраў. Эўразьвяз прадаставіць Югаславіі 450 мільёнаў, паведамляе "Радыё Свабода". Як заявіў віцэ-прэм’ер югаслаўскага ўраду Міралюб Лабус, што выступаў на канферэнцыі, учарашняе рашэньне ўладаў Сэрбіі выдаць Слабадана Мілошавіча дае міжнароднай супольнасьці магчымасьць дапамагчы Югаславіі ва ўзнаўленьні эканомікі. Колькі, цікава, каштуе Лукашэнка?
На сесіі Парлямэнцкай Асамблеі Савету Эўропы скончыла сваё работу дэлегацыя дэмакратычных сілаў Беларусі на чале зь віцэ-сьпікерам Вярхоўнага Савету 13-га скліканьня Анятолем Лябедзькам. Учора на паседжаньні Камітэту па юрыдычных пытаньнях і правах чалавека прайшлі заслухоўваньні па сытуацыі ў Беларусі. У сустрэчы прынялі ўдзел урадавыя й апазыцыйныя дэлегацыі, а таксама беларускія праваабаронцы.
“Верх свавольства і беззаконства” – так характарызуе аргкамітэт грамадзкага кааліцыйнага руху “За новую Беларусь!” прэзыдэнцкі дэкрэт №20. Як адзначаецца ў заяве аргкамітэту, дадзены дакумэнт зьяўляецца сьведчаньнем “няздольнасьці” сёньняшняга главы дзяржавы “перамагчы ў сумленнай барацьбе”, “ягонага жаданьня лішні раз перастрахавацца ад сумленных канкурэнтаў”.
Загадчык адзьдзелам па сувязях з грамадзкімі арганізацыямі Адміністрацыі прэзыдэнта Беларусі Валеры Мізееў падчас прэсавай канферэнцыі ня здолеў патлумачыць журналістам, на якой стадыі прадвыбарчай гонкі ейныя ўдзельнікі павінны прадстаўляць у ЦВК сваю і сваіх сваякоў дэклярацыі аб даходах і маёмасьці. Ён нават ня мог сказаць, ці існуюць у выбарчым кодэксе якіх-небудзь краінаў такія нормы, прадугледжаныя дэкрэтам Аляксандра Лукашэнкі №20, як дэкляраваньне даходаў і маёмасьці ня толькі кандыдата ў прэзыдэнты, але й ягоных дзяцей, унукаў, бацькоў, бабуль і дзядуль. Валеры Міхееў адмовіўся разважаць аб карэктнасьці ці некарэктнасьці дзеяньняў Лукашэнкі, які зьмяняе правілы вядзеньня выбарчай кампаніі ў той момант, калі яна ўжо пачалася.
“Спадар Прэзыдэнт! Я сумленна служыў Айчыне далёка да Вашага зьяўленьня на палітычнай арэне. Служыў яму пры Вас і, спадзяюся, буду служыць і надалей. Менавіта таму лічу неабходным выступіць з наступным зваротам. Рэспубліка Беларусь уступіла ў найважную палітычную кампанію – прэзыдэнцкія выбары. Ад дэмакрытычнасьці іх правядзеньня, роўных умоваў для ўсіх прэтэндэнтаў, залежыць, без перабольшваньня, будучае нашай краіны, што стала ў выніку сямігадовай аўтарытарнай самаўлады ў вачах ўсяго сьвету краінай-ізгоям. У выніку сталага парушэньня Канстытуцыі краіны, падмены заканадаўства дэкрэтамі й ўказамі разбурана эканоміка, грамадзяне ў галечы адсутнічаюць правы й свабоды”, - з такім лістом да Лукашэнкі зьвярнуўся кандыдат у прэзыдэнты Беларусі, Паўнамоцны амбасадар Латвіі, Эстоніі й Фінляндыі Міхаіл Марыніч.
У ноч на 23 чэрвеня ў вёсцы Сінегава Старадоржскага раёну Менскай вобласьці была апаганена цаква хрысьціянаў веры эвангельскіх “пяцідзесятнікаў”. Апаганьваньне паўтарылася і на наступную ноч. Мясцовы пастар выклікаў па тэлефоне міліцыю, аднак нарад так і не прыехаў. Адбывалася ўсё гэта падчас візыту на беларускую зямлю сьвяцейшага патрыярха Маскоўскага і ўсяе Русі Алексія ІІ, якога Аляксандар Лукашэнка назваў сваім настаўнікам і сябрам, паведамляе “БДГ”.
Падчас візыту калінінградзкай дэлегацыі ў Беларусь абмяркоўваліся транспартныя праблемы: як калініградцам, апярэджваючы ўвядзеньне візаў Літвою, зябясьпечыць найбольш спрыяльныя ўмовы транзыту людзей і грузаў праз Беларусь. Як паведамляе прэсавая служба адміністрацыі вобласьці, адзін са спосабаў вырашэньня гэтай праблемы ўдзельнікі паседжаньня бачаць у адраджэньні ідэі абыходнага шляху па тэрыторыі Польшчы.
Былы прэзыдэнт Югаславіі Слабадан Мілошавіч выдадзены Міжнароднаму крымінальнаму трыбуналу ААН па былой Югаславіі. Мілошавіч быў дастаўлены ў Гаагу ноччу з чацьвярга на пятніцу й зьмешчыны пад арышт. На дадзены момант ён знаходзіцца ў турме Шэфінінген, дзе ён ужо прайшоў медычны дагляд; яму зачыталі абвінавачваньні й выкладзены ягоныя правы.
, iнформэр
