 | ПАЛIТЫКА | |
Псыхапата на лыжароллерах сустрэлі пытаньнем аб зьніклых людзях
11:18, 03/07/2001
Сьвяткаваньне Дня вызваленьня Менску ад нямецка-фашысцкiх захопнiкаў зубры працягвалі на плошчы Незалежнасьці, куды для ўдзелу ў спартовай эстафеце прыбыў Аляксандра Лукашэнка. У падцьверджаньне свайго дыягназу – мазаічнай псыхапатыі – Лукашэнка вырашыў у ліпеньскую спёку праехацца па прашпэкце на лыжарольлерах. Стартаваць было вырашана як раз з плошчы Незалежнасьці. Аднак замест захопленых аплядысмэнтаў Лукашэнка пачуў як натоўп зуброў скандзіраваў: “Дзе Захаранка?”, “Дзе Завадзкі?”, “Дзе Ганчар?”,”Дзе Красоўскі?”
11:17, 03/07/2001
Калёна з 200 зуброў рушыць ў гэтую хвіліну па пустым прашпэкце Скарыны. Прашпэкт быў вызвалены ад народа і прамыты перад эстафетай. Мінакоў назад на праезджую частку ня выпусьцілі, аднак на пустую прастору выйшлі зубры. На вачах дзесяткаў тысячаў зьдзіўленых менчукоў яны маршам прайшлі праз увесь прашпэкт ад Кастрычніцкай плошчы да плошчы Незалежнасьці. На шляху яны скандзіравалі “Час выбіраць!”, “Жыве Беларусь!” і “Долой дурака!”. Гледачы адказвалі зубрам аплядысмэнтамі і падтрымлівалі скандзіраваньне. Да гэтага ўсе тры дні сьвятаў на прашпэкце працягвалася раздача інфармацыйных і агітацыйных матэрыялаў ЗУБРа. Дзесяткі тысячаў менчукоў зноў пачулі лёзунг “Час выбіраць!”
11:16, 03/07/2001
Восем актывістаў руху ЗУБР былі толькі што затрыманы супрацоўнікамі праваахоўчых ворганаў на скрыжаваньні вуліцы Валадарскага й прашпэкту Скарыны. Зубры прымалі ўдзел у народных гуляньнях па прашпэкце Скарыны, які на тры дні сьвяткаваньня Дня вызваленьня Менску ад нямецка-фашысцкiх захопнiкаўстаў пешаходнай зонай. За тое, што хлопцы й дзяўчаты раздавалі газэты “Наша Свабода” і дэманстравалі майкі й налепкі “Час выбіраць!”, міліцыя, нягледзячы на зьдзіўленьне й абурэньне адпачываючых у гэты час на прашпэкце людзей, запіхнула восем зуброў у аўтамабілі й павезла ў РАУС Цэнтральнага раёну Менску.
11:15, 03/07/2001
Сотні маладых людзей актывістаў моладзевага руху ЗУБР зьявіліся ў 12 гадзінаў дня ў цэнтры горада на прашпэкце Скарыны, які стаў на тры дні сьвята пешаходнай зонай. Парні й дзяўчаты раздаюць газэты “Наша свабода”, гуляюць разам з менчукамі й дэманструюць майкі й налепкі “Час выбіраць!”, актыўна прымаюць удзел у атракцыёнах і танчаць. Як заявіў прэсаваму цэнтру Хартыі`97 адзін з зуброў, яны “акупавалі” прашпэкт на цэлы дзень і маюць намер заставацца тут да вечара. Мінакі велімі добразычліва адносяцца да зуброў, фатаграфуюцца зь імі на памяць. Надалей мы будзем паведамляць пра разьвьцьцё сьвята.
11:14, 03/07/2001, ЗУБР
17 зуброў былі затрыманы ў Менску супрацоўнікамі праваахоўчых ворганаў 28 і 29 чэрвеня за распаўсюд спэцвыпуску газэты “Наша свабода”, прысьвечанага надыходзячым прэзыдэнцкім выбарам. У распаўсюджанай зубрамі газэце быў таксама апублікаваны скандальны ліст былых сьледчых пракуратуры Зьміцера Петрушкевіча й Алега Случака, якія абвінавацілі ўлады ў выкраданьнях і забойствах вядомых ў Беларусі людзей. Міліцыянты актыўна хапалі зуброў у розных частках горада і суправаджалі пад канвоем у вучасткі й апорныя пункты міліцыі.
11:13, 03/07/2001, ЗУБР
Акцыю-перфомэнс “Заробак-2001” правялі сёньня ў Барысаве актывісты руху ЗУБР. Падчас перазьменак, калі ля прахадных зьбіраліся практычна ўсе рабочыя прадпрыемстваў, людзі ў вусатых масках, якія надзіва нагадвалі Лукашэнку, раздавалі барысаўчанам доўгачаканы заробак. Кожны рабочы мог атрымаць купюру ў 100 “лукашыкаў” з выяваю фігі.
11:12, 03/07/2001, «Вечерний Минск»
Эксперыменты па адключэньню расейскіх каналаў, што сталі частымі ў апошні час, раздражняюць людзей. Толькі сьціхлі жарсьці па травеньскаму “фокусу” БТ, калі ўсіх тэлегледачоў павялі ў прымусовым парадку на экскурсію ў Палац рэспублікі, як новая навала па вечарах стала прападаць выява ГРТ.
11:11, 03/07/2001
Надзвычай стрымана і акуратна павіншаваў прэзыдэнт Расеі Ўладзімер Пуцін з Дзень вызваленьня Менску ад нямецка-фашысцкiх захопнiкаў Аляксандра Лукашэнку. Пуцін ні словам не згадаў пра надыходзячыя прэзыдэнцкія выбары, чым у чарговы раз падцьвердзіў свой намер не падтрымліваць Лукашэнку ў ягоным імкненьні балятавацца на другі тэрмін. У сваім кароткім віншаваньні Пуцін заўважыў, што неабходнай умоваю пасьпяховага станаўленьня й разьвіцьця дзяржавы зьяўляецца прыхільнасьць да агульнапрынятых прынцыпаў свабоды й дэмакратыі. “Упэўнены, што мэтанакiраваныя намаганьні, заснаваныя на гэтых прынцыпах, дазволяць забясьпечыць расеянам і беларусам мірнае й годнае жыцьцё”, - асабліва падкрэсьліваецца ў віншаваньні.
11:10, 03/07/2001
На сайце Хартыі’97 ў разьдзеле “Форум” зьявілася новая тэма – “Сьвежым анекдотам па рэжыму”. Наведавальнікі нашага сайту могуць прачытаць і адправіць у новы разьдзел сьвежыя анекдоты пра дыктатара і ягоны рэжым. Напрыклад, такія, як гэты: Прыходзіць да Лукашэнкі памочнік і кажа: - Аляксандар Рыгоравіч, вы нарэшце сталі выязным. - Так? І куды мая першая паездка? - У Гааагу.
11:09, 03/07/2001
Сапраўды гіпертрафіраваныя формы набывае імкненьне ўладаў паказаць сваю блізкасьць да народу. У спробе даказаць сваю “народнасьць” Лукашэнка й яго акружэньне наладзілі агульнарэспубліканскае сьвята такім чынам, якім, на іхнюю думку, яно павінна падабацца нам з вамі. А менавіта – з ваенным парадам, дэмантрацыяй “дасягненьняў” беларускай прамысловасьці, спартовым шэсьцем, лыжным прабегам пасярод лета, перакрытым для аўтаруху цэнтрам горада і так далей. Падабаецца? Наўрадці. Аднак мы будзем паведамляць, што адбываецца на менскіх вуліцах і разьмесьцім на сайце фатаздымкі з гэтага пампезнага “сьвята” у савецкім стылі. Апошняга ў гісторыі гэтай краіны. Прыйшоў ЧАС ВЫБІРАЦЬ новае жыцьцё.
11:08, 03/07/2001
“Аляксандр Рыгоравіч! 29 чэрвеня я атрымаў Вашае запрашэньне прысутнічаць на парадзе войскаў, а таксама пропуск на трыбуну. Прыняць гэтае запрашэньне я не магу. Я адмаўляюся ад яго не таму, што Вашая спроба публічна прадэманcтраваць прымірэньне – ня болей чым піяраўскі ход з далёка вылічынымі наступствамі”, - так пачынаецца адкрыты ліст, зь якім экс-прэм’ер-міністар Беларусі й патэнцыйны кандыдат у прэзыдэнты Міхаіл Чыгір зьвярнуўся да Аляксандра Лукашэнкі напярэдадні наладжанага ім параду ў Дзень вызваленьня Менску ад нямецка-фашысцкiх захопнiкаў.
Да суда над выкрадальнікамі Завадзкага засталіся лічаныя дні
11:07, 03/07/2001
У хуткім часе крымінальная справа адносна асобаў, якія падазраюцца ў зьдзяйсьненьні шэрагу цяжкіх злачынстваў, у тым ліку ў выкраданьні аператара ГРТ Зьміцера Завадзкага й забойстве азэрбайджанскай сям’і, - павінна быць накіравана ў суд. Пра гэта БелаПАН паведамілі абаронцы некаторых абвінавачаных. Для разгляду ў суд будуць перададзены матэрыялы па дзевяцi злачынствах.
11:06, 03/07/2001
Разгляд зыску расейскай тэлекампаніі НТБ да Нацыянальнай дзяржаўнай тэлерадыёкампаніі пачаў Вышэйшы гаспадарчы суд 29 чэрвеня. Інтарэсы НТБ прадстаўляе ТАА “Відэё інтэрнэшннл” – выходнае прадпрыемства ТАА “Медыя Сэрвіс АРТ”, якое зьяўляецца рэклямным агентам НТБ на тэрыторыі Беларусі (само ТАА “Медыя Сэрвіс Арт” ня можа падаць зыск, бо не зьяўляецца рэзыдэнтам Рэспублікі Беларусь). Істца абвінавачвае адказчыка ў незаконным разьмяшчэньні рэклямных блёкаў у эфіры тэлекампаніі НТБ, пачынаючы з 3 лютага і патрабуе пакрыцьця ўрону на суму 56 409 495 беларускіх рублёў (40,9 тысячаў даляраў).
11:05, 03/07/2001
Дэлегацыя Нацыянальнага сходу Лаоскай Народна-Дэмакратычнай Рэспублікі на чале з кіраўніком парлямэнту Саманам Віньякетам 4 ліпеня прыбывае з візытам ў Менск. На наступны дзень парлямэнтарыі наведаюць адно з асноўных прадпрыемстваў ВПК рэспублікі - Беларускае оптыка-механічнае аб`яднанне - і кампанію "Белтэхэкспарт" - упаўнаважаную ўрадам на правядзенне ўсяго комплексу работ па рэалізацыі, рамонту і мадэрнізацыі ваеннай тэхнікі і ўзбраення.
11:04, 03/07/2001
Па дадзеных Міністэрства статыстыкі й аналізу Беларусі, за першыя тры тыдні чэрвеня рост спажывецкіх коштаў у краіне склаў 1,9 адсоткі (за першы тыдзень – 1,2 адсоткі, за другі- 0,3, за трэці - 0,4). Для параўнаньня: за першыя тры тыдні траўня кошты вырасьлі на 1,8 адсоткі.
11:03, 03/07/2001
Калі Ўкраіна лідыруе па выніках першых 5 месяцаў 2001 года сярод краінаў СНД па тэмпах росту прамысловай вытворчасьці (па дадзеных міждзяржаўнага статкамітэту СНД прамысловы рост у краіне склаў у параўнаньні са студзенем –- траўнем 2000 года 18,8%), то Беларусь па тым самым тэмпам росту прамысловай вытворчасьці застаецца далёка ззаду. Па дадзеных статкамітэту прамысловы рост тут склаў 3,4%.
11:02, 03/07/2001
Па выніках перарэгістрацыі з 2000 года на дадзены момант Вярхоўны суд РБ, а таксама суды абласьцей і Менску разглядзелі больш за 100 справаў з вынясеньнем рашэньняў аб ліквідацыі грамадзкіх аб’яднаньняў. У 2000 г. вынесена больш за 200 пісьмовых папярэджаньняў, за 5 месяцаў т.г. – больш за 60. За перыяд з кастрычніка 2000 г., па сёньняшні час адмоўлена ў рэгістрацыі 170 грамадзкім аб’яднаньням.
11:01, 03/07/2001
У 11 раёнах Віцебскай вобласьці якасьць пітной вады не адказвае прад’яўленым патрабаваньням, а ў 10 раёнах трэба тэрмінова рамантаваць лазьні. Такія факты прагучалі на нядаўнім паседжаньні аблвыканкаму пры абмеркаваньні праблемаў рэгіёнаў. Як паведамляе “Народнае слова”, старшыня Віцебскага аблвыканкаму даў даручэньне абласным службам дэтальна прааналізаваць сытуацыю і засяродзіцца на ўвядзеньні водазабораў і рамонце лазьняў. На буйныя будоўлі ўсё роўна грошай не хапае, а тут можна без вялікіх фінансавых уліваньняў палепшыць сацыяльна-бытавыя ўмовы пражыцьця насельніцтва.
| |
|
, iнформэр
