Да суда над выкрадальнікамі Завадзкага засталіся лічаныя дні :: Хартыя'97 :: Навiны

У хуткім часе крымінальная справа адносна асобаў, якія падазраюцца ў зьдзяйсьненьні шэрагу цяжкіх злачынстваў, у тым ліку ў выкраданьні аператара ГРТ Зьміцера Завадзкага й забойстве азэрбайджанскай сям’і, - павінна быць накіравана ў суд. Пра гэта БелаПАН паведамілі абаронцы некаторых абвінавачаных. Для разгляду ў суд будуць перададзены матэрыялы па дзевяцi злачынствах.

У іхнім зьдзяйсьненьні падазраюцца ў прыватнасьці былы афіцэр спэцпадразьдзяленьня МУС “Алмаз” Валеры Ігнатовіч, былы баец гэтага спэцпадразьдзяленьня Максім Малік, былы курсант Акадэміі МУС Аляксей Гуз і раней судзімы грамадзянін Беларусі Сяргей Савушкін.

Усе пацярпелыя і іхнія прадстаўнікі, а таксама абвінавачаныя і іхнія адвакаты азнаёміліся з матэрыяламі 40-томнай крымінальнай справы. У лік апошніх 29 чэрвеня скончыла гэтае азнаямленьне Юлія Южаніна – абаронца Сяргея Савушкіна. Як яна паведаміла БелаПАН, кіраўніцтва сьледчай групы зацікавілася, ці згодна яна на перадачу гэтай справы для разгляду ў Вярхоўны суд. Справа ў тым, што, у адпаведнасьці з часткай 269 Крымінальна-працэсуальнага кодэксу Беларусі “Вярхоўнаму суду РБ падсудны крымінальныя справы... перададзены ў суд са згоды абвінавачанага і ягонага абаронцы...”. Разам з тым, у другой частцы гэтага ж артыкулу гаворыцца, што “Вярхоўны суд РБ мае права прыняць да вытворчасьці па ўласнай ініцыятыве любую крымінальную справу”.

Некаторыя абаронцы і сваякі абвінавачаных лічаць, што хутэчй за ўсё яно так і будзе. Улады, на іхнюю думку, сьпяшаюцца скончыць гэтую справу да прэзыдэнцкіх выбараў. Аднак абвінавачаным гэта вельмі нявыгадна, паколькі ў выпадку разгляду справы ў гарадзкім судзе прысуд можна абскардзіць у касацыйнымым парадку ў Вярхоўным судзе. Прысуд Вярхоўнага суда зьяўляецца канчатковым і абскарджваньню не падлягае, а ў выпадку доказу віны абвінавачаным пагражае пакараньне сьмерцю.

Абаронцы адмовіліся камэнтаваць, як адбываецца расьсьледаваньне крымінальнай справы. Яны толькі заявілі, што незалежна ад сьледзтва разгляд справы ў судзе будзе вельмі цяжкім.