ЗУБР выплаціў рабочым абяцаныя 100 даляраў :: Хартыя'97 :: Навiны

Акцыю-перфомэнс “Заробак-2001” правялі сёньня ў Барысаве актывісты руху ЗУБР. Падчас перазьменак, калі ля прахадных зьбіраліся практычна ўсе рабочыя прадпрыемстваў, людзі ў вусатых масках, якія надзіва нагадвалі Лукашэнку, раздавалі барысаўчанам доўгачаканы заробак. Кожны рабочы мог атрымаць купюру ў 100 “лукашыкаў” з выяваю фігі.

Гэтая акцыя стала працягам сацыяльнай кампаніі, якая шырока разьвярнулася ЗУБРом у Барысаве. Сярэдні заробак на барысаўскіх прадпрыемствах ледзь-ледзь дацягвае да 60-70 даляраў, што амаль у два разы меней за абяцаныя Лукашэнкам 100 даляраў. За некалькі дзён да акцыі, у заводзкай частцы горада зьявіліся трафарэты з выяваю ўсё той самай вусатый фігі на фоне 100 даляраў і надпісам “Адчуваеш, чым пахне?” Нягледзячы на тое, што праблема заробку дастаткова хвалюе, рабочыя з разуменьнем і гумарам аднесьліся да зуброўскай акцыі. Хтосьці жартаваў: “Можа пакінуць сто “лукашыкаў” на будучае, можа зьявіцца й такая валюта”. Аднак каля аднаго з прадпрыемстваў міліцыянты ў штацкім папрасілі чалавека ў вусатай масцы раздаваць “лукашыкі” ў іншым месцы і лепш уначы. Вусатая фіга падалася ім падобнай на аднаго зь беларускіх палітычных лідэраў. На каго менавіта, яны чамусьці тлумачыць не змаглі і таму адпусьцілі зуброў.

Акцыя “Заробак-2001” будзе працягвацца яшчэ некалькі дзён, бо агалечаных людзей, якім ня толькі ня плоцяць абяцаныя 100 даляраў, але й вінны палову таго, што абяцалі, занадта шмат і “лукашыкі” прыйдуцца як раз дарэчы.