7 сутак арышту за гнілы памідор у бок Лукашэнкі :: Хартыя'97 :: Навiны

Суд Ленінскага раёну Менску вынес рашэньне па адміністратыўнай справе Сяргея Лапцева, 45-гадовага беспрацоўнага жыхара Менску, які 3 ліпеня падчас спартовай эстафеты кінуў у Лукашэнку памідор. Судзьдзя Зьміцер Жданок вынес рашэньне – 7 сутак адміністратыўнага арышту. На судзе Сяргей Лапцеў падцьвердзіў палітычныя матывы свайго ўчынку – “адрадзіў старую традыцыю закідваць памідорамі благіх акцёраў”.

Сяргея Лапцева схапілі й адвезьлі ў РАУС Ленінскага раёну Менску адразу пасьля яго кідка, 3 ліпеня. Толькі позна ўначы міліцыя вызначылася з артыкулам пратаколу – артыкул Крымінальнага кодэксу “абраза прэзыдэнта” вырашылі не выкарыстоўваць. Сяргея Лапцева абвінавацілі ў дробным хуліганстве.

Слова “памідор” на судовым працэсе над Лапцевым судзьдзя стараўся не згадваць і замяняў яго на слова “прадмет”. Сьведкам на судзе выступаў экспэрт Крымінальнага цэнтру ГУУС Менгарвыканкаму Вадзім Лагуноўскі, які затрымліваў Лапцева. На судзе Лагуноўскі паведаміў, што ён стаяў у трэцім шэрагу і назіраў за ўдзельнікамі спартовай эстафеты. За сіпіной адчуў рух – кідок. Гэта й стала падставаю для затрыманьня. Пасьля вынясеньня судовага рашэньня Сяргей Лапцеў пад канвоем быў дастаўлены ў спэцпрыёмнік-разьмеркавальнік на Акрэсьціна.