Дэпутаты Вярхоўнага Савету выступілі ў абарону Валеры Шчукіна :: Хартыя'97 :: Навiны

“Дэпутат Вярхоўнага Савету 13 скліканьня Валеры Шчукін атрымаў 3-х месячны тэрмін, які ён зараз адбывае ў славутай Жодзінскай турме, у адным з самых жахлівых месцаў утрыманьня ў рэспубліцы і адкуль ён можа выйсьці інвалідам. Так улада распраўляецца з бясстрашным дэпутатам, праваабаронцам і журналістам. Мы, калегі Валеры Шчукіна, патрабуем яго неадкладнага вызваленьня і пакараньня вінаватых у супрацьпраўных дзеяньнях супраць Шчукіна, - з такой заяваю выступілі 35 дэпутатаў Вярхоўнага Савету 13 скліканьня. Заява-пратэст супраць арышту Валеры Шчукіна і ўтрыманьня яго ў Жодзінскім СІЗА падпісалі й патэнцыйныя кандыдаты ў прэзыдэнты Сямён Домаш, Уладзімер Ганчарык і Сяргей Калякін, якія таксама зьяўляюцца дэпутатамі ВС. Мы прыводзім тэкст заявы цалкам:

“28 чэрвеня лаўрэата Нацыянальнай прэміі ў абарону правоў чалавека, дэпутата Вярхоўнага Савету 13 скліканьня, журналіста Валеры Шчукіна нечакана перавялі са сьледчага ізалятару ГУУС Менгарвыканкаму ў сьледчы ізалятар УУС Менскай вобласьці (УЖ 15/8) у горадзе Жодзіна. Турма, дзе зараз знаходзіцца Валеры Шчукін, лічыцца адной з самых жахлівых месцаў утрыманьня ў рэспубліцы. Вязьні там стала па-зьверску зьбіваюцца ахоўнікамі. У перапоўненых душных камерах зьбітыя людзі пакрываюцца струпамі й язвамі. Кіраўніцтва і ахова турмы зьдзекуюцца над людзьмі проста так, кіруемыя садысцкімім схільнасьцямі. Апошняе, што стала вядома пра Валеры Шчукіна, гэта тое, што яму гвалтоўна згалілі бараду.

Валеры Шчукін быў асуджаны на 3 месяцы турмы толькі за тое, што хацеў прайсьці на прэсавую канферэнцыю міністра ўнутраных справаў Беларусі Ўладзімера Навумава, якая была наладжана адносна расьсьледаваньня “гучных справаў” аб зьніклых – вядомых у Беларусі людзей, і праводзілася ў рэжымным будынку МУС. Журналістаў у будынак прапускалі па зацьверджаных сьпісах. Валеры Шчукін спрабаваў трапіць у гэтыя сьпісы аднак яму адмовілі. Валеры Аляксеевіч паспрабаваў прайсьці на мерапрыемства па пасьведчаньню члена БАЖ. Тады трое міліцыянтаў схапілі яго й павалілі на падлогу. Журналіст пры гэтым выпадкова разьбіў нагой шкляныя дзьверы і быў паранены асколкамі шкла.

Праз той нязначны інцыдэнт Валеры Шчукін атрымаў 3-х месячны тэрмін, адкуль ён можа выйсьці інвалідам. Так улада распраўляецца з бясстрашным дэпутатам, правабаронцам, журналістам.

Мы, калегі Валеры Шчукіна, патрабуем яго неадкладнага вызваленьня й пакараньня вінаватых у супрацьпраўных дзеяньнях супраць Шчукіна”.

Заява дэпутатаў Вярхоўнага Савету будзе перададзена ва ўсе ўплывовыя міжнароодныя структуры.