Расьсьледаваньне гібелі людзей на Нямізе скончана. Абвінавачаных усяго двое :: Хартыя'97 :: Навiны

Пракуратура Беларусі скончыла папярэдняе расьсьледаваньне крымінальнае справы па трагічных падзеях на станцыі метро “Няміга” ў Менску, дзе 30 траўня 1999 года загінулі 53 чалавека, а каля 200 атрымалі пашкоджаньні. Авінавачваньне ў нядбайнасьці прад’яўлена афіцэрам міліцыі – намесьніку начальніка ГУУС Менгарвыканкаму падпалкоўніку Віктару Русаку й маёру міліцыі, былому супрацоўніку ГУУС Міхаілу Кандраціну, якія праявілі сябе з свой час на акцыях апазыцыі, калі яны далёка ненядбайна, а наадварот старанна разганялі і саджалі дэманстарантаў.

Абодва міліцыянты не прызнаюць сябе вінаватымі. Русак адмовіўся па гэтай прычыне ад сьведчаньняў. Кандрацін, як удзельнік ліквідацыі наступстваў аварыі на ЧАЭС, трапіў пад амністыю. Ён таксама не прызнае сваёй віны ў трагедыі, і таму ад амністыі адмовіўся.

4 ліпеня ў Пракуратуру Беларусі былі запрошаны пацярпелыя ў гэтай трагедыі і сваякі загінулых, а таксама іхнія юрыдычныя прадстаўнікі. Кіраўнік сьледчай групы, начальнік сьледчага адзьдзелу па асабліва важных справах Валеры Кудзін коратка азнаёміў прысутных з вынікамі сьледзтва і распавёў аб працэдуры азнаямленьня з матэрыяламі справы. Матэрыялы крымінальнай справы складаюць 19 тамоў. Прысутныя на сустрэчы ў пракуратуры бацькі загінулых дзяцей не ў ва ўсіх задаволены вынікамі расьсьледаваньня. На іхнюю думку, сьледзтва па незразумелых прычынах не знайшло віны ў дзеяньнях гарадзкіх уладаў, якія зацьвердзілі праграму забаўляльных мерапрыемстваў 30 траўня, якая ўключала ў сябе выступ папулярных музычных калктываў і бясплатную раздачу піва, што зьяўляецца несумяшчальмі рэчамі.