Аляксея Шыдлоўскага зноў будуць судзіць за графіці :: Хартыя'97 :: Навiны

Суд над актывістам руху ЗУБР Аляксеем Шыдлоўскім адбудзецца 25 ліпеня ў судзе Цэнтральнага раёну Менску. Крымінальная справа па артыкуле 341 КК супраць Шыдлоўскага і яшчэ траіх удзельнікаў руху было ўзбуджана ў лютым гэтага года. Усіх іх абвінавачваюць у тым, што яны наносілі графіці “ЗУБР” на сьцены выканкаму і блізкіх да яго дамоў Партызанскага раёну Менску. Вырашаць лёс зуброў на надыходзячым працэсе будзе вядомы судзьдзя Барысёнак, на ўліку якога не адзін дзесятак судовых працэсаў над удзельнікамі акцыяў апазыцыі. Не адзін раз ён судзіў і дэпутата Вярхоўнага савету 13-га скліканьня Валеры Шчукіна.

Нагадаем, што Анатоль Алізар, Сяргей Коктыш, Аляксандар Ермакоў, тады яшчэ студэнты 5 курса факультэту журналістыкі, былі затрыманы 26 студзеня 2001 года ля будынку Партызанскага райвыканкаму. Супраць іх узбуджана крымінальная справа па артыкулу 218 ч.1 КК РБ.

Праз некалькі дзён па гэтай самай справе зьявіўся яшчэ адзін абвінавачаны – актывіст руху ЗУБР Аляксей Шыдлоўскі.

У чаканьні суда, варта згадаць, што адзін з падсудных, Аляксей Шыдлоўскі, як вядома, быў арыштаваны ў 1997 годзе разам з Вадзімам Лабковічам па абвінавачваньнi ў злосным хуліганстве за нанясеньне антыпрэзыдэнцкага графіці, якія ён разам зь сябрамі напісаў на сьценах дамоў горада Стаўбцы Менскай вобласьці.

І нягледзячы на тое, што большасьць было ўпэўнена, што за такое “злачынства” яго наўрадці чакае сур’ёзнае пакараньне, Шыдлоўскі 24 лютага 1998 года быў асуджаны на 1,5 гады пазбаўленьня волі ў лягерах узмоцненага рэжыму. Ягоны таварыш Вадзім Лабковіч такі самы тэрмін атрымаў умоўна...