Сацыял-дэмакраты Швэцыі асуджаюць Гарбачова за сустрэчу з Лукашэнкам :: Хартыя'97 :: Навiны

Оскар Стэнстрэм, намесьнік міжнароднага сакратара і член Сацыял-Дэмакратычнай партыі Швэцыі накіраваў зварот на імя Міхаіла Гарбачова старшыні Расейская Аб’яднанай Сацыял-Дэмакратычнай Парты і асудзіў ягоную сустрэчу з Аляксандрам Лукашэнкам ў Маскве. Далей ідзе тэкст ліста цалкам:

Паважаны Міхаіл Гарбачоў,

Як нам стала вядома, вамі нядаўна была праведзена сустрэча і прэсавая канферэнцыя з удзелам прэзыдэнта Беларусі Аляксандра Лукашэнкі, падчас рабочага візыту апошняга ў Маскву. Гэтую інфармацыю мы атрымалі з бюлетэню, разасланага беларускай амбасадай у Швэцыі 22 чэрвеня.

Я б хацеў удакладніць у вас, ці праўда гэта? Нашая партыя надзвычай занепакоена разьвіцьцём падзеяў на Беларусі за час кіраваньня Аляксандра Лукашэнкі. Ці сапраўды вашая партыя не ўсхвалявана той сытуацыяй, якая склалася на Беларусі?

У бюлетэні гаворыцца, што вы абменяліся жартамі, павіталі СМІ і, зьвяртаючыся да вас, Аляксандар Лукашэнка адзначыў, што «ваши средства массовой информации очень капризны». Далей па тэксце Аляксандар Лукашэнка заявіў, што вашыя словы былі для яго як «бальзам на раны» і што вы станоўча адазваліся аб ягонай палітыцы літаральна наступным чынам: “ У агуле я знахожу палітыку Аляксандра Лукашэнкі пазытыўнай і павінен сказаць, што калі вырашаўся лёс СССР, ён быў адзіным, хто ўстрымаўся ад галасаваньня, у той час як астатнія адправілі краіну ў небыцьцё”.

З павагаю,

Оскар Стэнстрэм