ЗША ўвялі забарону на ўвоз беларускай сталі :: Хартыя'97 :: Навiны

Беларускі металюргічны завод у Жлобіне згубіў выгадны амэрыканскі рынак. Па словах начальніка адзьдзелу ЗША й Канады МЗС Беларусі Ігара Губарэвіча, пасьля рашэньня Mіністэрства гандлю ЗША вызначыць памер мытнага збору з імпарту беларускай стальной арматуры ў 114,5% ейныя пастаўкі сталі нерэнтабельнымі.

Усё пачалося 17 студзеня, калі амэрыканцы ўвялі антыдэмпінгавую маржу на ўвоз сталі з шэрагу краінаў. Разам зь Беларусьсю ў сьпіс трапілі Польшча, Латвія, Малдова, Украіна, Кітай, Паўднёвая Карэя і Інданэзыя. ЗША палічылі, што стальная арматура з гэтых краінаў прадаецца на іхняй тэрыторыі па зьніжаных нярынкавых коштах, што наносіць шкоду ўнутраным вытворцам, і аб’явілі аб правядзеньні антыдэмпінгавага расьследаваньня. На час, пакуль яно будзе йсьці, 135 дзён, быў вызначаны часовы антыдэмпінгавы збор, які павінен быў дадавацца да замоўленага кошту прадукцыі.

Тады БМЗ, адзінаму вытворцу сталі ў Беларусі, быў прадпісаны “штраф” у 74% маржы. Па сканчэньні антыдэмпінгавага расьсьледаваньня памер мытнага збору павялічыўся да 114%. У 1999 годзе жлобінскі завод прадаў у ЗША 72 тыс.тонаў сталі на агульную суму $12,3 млн, за першыя 7 месяцаў 2000 года – 56 тыс.тонаў на $10,2 млн (пастаўкі скараціліся яшчэ да ўвядзеньня антыдэмпінгавых мераў). У 1998 годзе доля БМЗ у агульным аб’ёме імпартаванай у ЗША сталі склалі 2%, у 1999 годзе – 4%, на 2000-2001 гг. меркавалася павялічыць гэтыя паказчыкі.