Юры Бандажэўскі стаў уладальнікам пашпарту свабоды :: Хартыя'97 :: Навiны

Былы рэктар Гомельскага медычнага інстытута прафесар Юры Бандажэўскі, асуджаны на 8 гадоў турэмнага зьняволеньня, стаў уладальнікам эўрапэйскага пашпарту свабоды. Бандажэўскі стаў 25-м чалавекам на планеце, які атрымаў пашпарт свабоды, што дае права свабодна перамяшчацца па Эўропе і выбіраць у якасьці месца жыхарства любую краіну кантыненту.

Акрамя таго, заяву ў сувязі з асуджэньнем Бандажэўскага прыняў Міжнародны сацыяльна-экалягічны саюз. Гэтая арганізацыя аб`ядноўвае сотні грамадзкіх фарміраваньняў, сур`ёзныя навуковыя арганізацыі, а яе сустаршынямі зьяўляюцца вядомыя расейскія вучоныя Свет Забелін і Леанід Фёдараў. У заяве асуджаецца перасьлед вучоных-радыёлагаў у Беларусі.

У дакумэнце гаворыцца аб крымінальным перасьледзе прафесара Юры Бандажэўскага, заснавальніка і былога рэктара Гомельскага дзяржаўнага медінстытута, і аб зьверскім зьбіваньні Аляксандра Дэвойны, намесьніка дырэктара недзяржаўнага інстытута радыяцыйнай бясьпекі "Белрад". Таксама ў заяве сцьвярджаецца, што Міністэрства аховы здароўя Беларусі "працягвае спробы забараніць дзейнасьць "Белрада", супрацоўнікі якога высьвятляюць сапраўдную велічыню радыяцыйнай нагрузкі на беларускіх дзяцей".

Як лічыць Міжнародны сацыяльна-экалагічны саюз, "прычына перасьледу, які абрынуўся на дактароў і вучоных-радыёлагаў, у тым, што іх дасьледаваньні аб`ектыўна даказваюць сьвядомае заніжэньне доз радыяцыі, якія атрымліваюць зараз жыхары Беларусі, і асабліва дзеці".

Міжнародны сацыяльна-экалягічны саюз выказаў закляпочанасьць сытуацыяй вакол прафесара Бандажэўскага і заявіў, што прыгавор у дачыненьні да яго сфабрыкаваны, а віна вучонага заключаецца толькі ў тым, што "ён сумленна гаворыць пра вынікі сваіх работ па небяспечнаму ўплыву малых доз радыяцыі на арганізм чалавека".

Заяўнікі запатрабавалі ад уладаў Беларусі "неадкладнага вызваленьня прафесара Бандажэўскага", а да арганізацый - членаў саюза, а таксама іншых аб`яднанняў звярнуліся з просьбай накіроўваць лісты ў абарону прафесара Бандажэўскага.