 | ПАЛIТЫКА | |
Брытанскі міністар – Палаце Абшчын: “Спадзюся, беларускі ўрад ня будзе стаяць на нашым шляху”
11:15, 12/07/2001
Дзяржаўны Міністар Вялікабрытаніі сп.Петэр Хаін выступіў 9 ліпеня перад лёнданскай Палатай Абшчын падчас абмеркаваньня парлямэнтарыямі беларускага пытаньня. Міністар пазнаёміў членаў Палаты з падзеямі, якія адбываюцца на Беларусі напярэдадні прэзыдэнцкіх выбараў. Міністар пазнаёміў членаў Палаты з трывожнымі падзеямі ў Беларусі, а таксама міжнароднай абстаноўкаю вакол Беларусі. Ніжэй мы прапануем вашай увазе тэкст выступу цалкам: 
11:14, 12/07/2001
Прадстаўнікі “пяцёркі” ў хуткім часе маюць намер зьвярнуцца ў Цэнтрвыбаркам з адкрытаю заяваю, у якой будуць пералічаны выпадкі парушэньня выбарчага заканадаўства ініцыятыўнай групай Аляксандра Лукашэнкі, паведамляе “БДГ”. Сабраныя “пяцёркай” факты вельмі разнастайныя.
11:13, 12/07/2001
Несанкцыянаваны пракурорам вобыск правялі сёньня ў рэдакцыі крычаўскай газэты “Вольны горад” супрацоўнікі праваахоўчых ворганаў. Як стала вядома прэс-цэнтру Хартыі’97, з офісу без прад’яўленьня ордэра на вобыск была канфіскавана ўся оргтэхніка. Больш за тое, у рэдакцыі знаходзіўся штаб па збору подпісаў у падтрымку Сямёна Домаша і міліцыянты, не абцяжарваючы сябе тлумачэньнямі, канфіскавалі адтуль 1000 подпісаў у падтрымку Домаша. Траіх супрацоўнікаў правялі ў міліцэйскі участак.
11:12, 12/07/2001
Беларускі Гэльсінкскі камітэт накіраваў у судовую калегію па грамадзянскіх справах Вярхоўнага Суда Беларусі скаргу з просьбаю ўзбудзіць грамадзянскую справу і прыняць рашэньне аб прызнаньні пастановы Цэнтрвыбаркаму “Аб тлумачэньні выкананьня некаторых палажэньняў дэкрэта “Аб абавязковым дэкляраваньні даходаў і маёмасьці кандыдата ў прэзыдэнты”, які не адпавядае дзейнаму заканадаўству Беларусі.
11:11, 12/07/2001
Запазычанасьць сельскай гаспадаркі Беларусі за спажытыя нафтапрадукты можа сур`ёзна паўплываць на забесьпячэньне палівам уборкі зерня. Як паведаміў БелаПАН крыніца ва ўрадзе, толькі Міністэрства сельскай гаспадаркі і харчаваньня вінна канцэрну «Белнафтахім» за нафтапрадукты, спажытыя падчас вясновай пасяўной кампаніі, больш за 11 мільярдаў рублёў.
11:10, 12/07/2001
У гэтым годзе ў Беларусі значна скарацілася рэалізацыя нафтапрадуктаў. Па дадзеных Міністэрства статыстыкі й аналізу, за прершыя паўгады 2001 года ў Беларусі рэалізавана 294 436 тонаў аўтабензіну, ці 74,2 адсоткі да адпаведнага летняга перыяду, дызельнага паліва - 46 368 тонаў (83,5%), печнога паліва - 38 888,2 тоны (92,1%), мазуту - 549 194,7 тоны (76,8%), нафтабітуму - 86 065,4 тонаў (66,7%).
11:09, 12/07/2001
Беата Разуміловіч, Першы сакратар Кансультатыўна-назіральнае групы АБСЭ, 11 ліпеня наведала Валеры Шчукіна ў СІЗА УУС Менскай вобласьці ў горадзе Жодзіна. Паколькі на дадзены момант сп.Разуміловіч знаходзіцца ў ад’езьдзе, дадатковая інфармацыя пра візыт першага сакратара КНГ АБСЭ ў Жодзінскае СІЗА адсутнічае.
11:08, 12/07/2001
Жонкі зьніклых і рэпрэсаваных палітыкаў, Людміла Карпенка, Ірына Красоўская, Сьвятлана Завадзкая, Вольга Захаранка і Тацяна Клімава, учора вярнуліся з Парыжа, дзе яны выступалі перад дэлегатамі Парлямэнцкай Асамблеі АБСЭ. “Паколькі нашыя ўлады не зьбіраюцца праводзіць расьсьледаваньня зьнікненьняў і забойстваў вядомых у Беларусі людзей, то мы вырашылі самі нагадаць міжнароднай грамадзкасьці аб тым, што гэтыя зьнікненьні й забойствы ёсьць і існуюць у Беларусі”, - паведаміла прэс-цэнтру Хартыі’97 Людміла Карпенка, жонка памерлага пры загадкавых абставінах віцэ-сьпікера Вярхоўнага Савету 13-га скліканьня й старшыні ценявога ўраду, Нацыянальнага выканаўчага камітэту, Генадзя Карпенкі.
11:07, 12/07/2001, «Народная воля»
Вядомы рэвалюцыянэр і патрыёт Беларусі Валеры Шчукін прыслаў ліст з жодзінскага СІЗА. Кожны раз, сыходзячы на чарговую адсідку, Валеры Аляксеевіч прасіў: “Можаце не насіць мне сухары, галоўнае – перадавайце газэты. Без інфармацыі там цяжэй за ўсё”.
11:06, 12/07/2001
Дэпутат Жодзінскага гарсавету Аляксандар Валчанін у эсклюзіўным інтэрвію Радыё Свабода ўпершыню публічна патлумачыў, чаму адмовіўся ад паўнамоцтваў кіраўніка мясцовай ініцыятыўнай групы па вылучэньні кандыдатам у прэзыдэнты Аляксандра Лукашэнкі. Паводле спадара Валчаніна, галоўная прычына — палітычная.
11:05, 12/07/2001
150 мінімальных заробкаў – такі штраф павінен заплаціць Зьміцер Фядорчанка з Барысава за ўдзел у пікеце ў гадавіну зьнікненьня аператара ГРТ Зьміцера Завадзкага. Нягледзячы на тое, што Зьміцер Фядорчанка беспрацоўны, судзьдзя Наталя Вайцэховіч абавязала яго заплаціць штраф у 750 даляраў.
11:04, 12/07/2001
“Мы плянуем да моманту рэгістрацыі вызначыцца з адзіным кандыдатам”, - заявіў Сямён Домаш 10 ліпеня ў Брэсьце на сустрэчы з членамі сваёй ініцыятыўнай групы Брэсцкай вобласьці. Па словах Домаша, пяцёра прэтэндэнтаў у прэзыдэнты ад шырокай грамадзянскай кааліцыі на сустрэчы 9 ліпеня “у чарговы раз падцвердзілі намер працаваць у адной камандзе незалежна ад таго, хто зь іх стане адзіным кандыдатам”.
Адрыян Севярын перавыбраны старшынёй ПА АБСЭ
11:03, 12/07/2001
Былы міністар замежных справаў Румыніі Адрыян Севярын большасьцю галасоў перавыбраны старшынёй Парлямэнцкай Асамблеі АБСЭ. Галасаваньне прайшло вечарам 10 ліпеня ў Парыжы. У той самы дзень на сесіі была прынята рэзалюцыя аб СМІ. У ёй у прыватнасьці, згадваецца Беларусь. Адзначаецца, што ў гэтай краіне “незалежныя мас-медыі ці забараняюцца, ці фукцыянуюць у цяжкіх умовах”.
11:02, 12/07/2001, Прэс-цэнтар ФПБ
Згодна дадзеным Міністэрства статыстыкі і аналізу, на пачатак чэрвеня запазычанасьць па заробку дасягнула 11,9 млрд. руб. (8,7 млн. USD). Гэта на 39,5% больш, чым месяц таму. Самая вялікая пазыка перад прадпрыемствамі аграпрамысловага комплексу. За травень ён вырас на 37,5% і склаў 70,6% ад агульнай запазычанасьці. На прамысловых прадпрыемствах па заробку ня выплацілі 2,5 млрд. руб. (1,8 млн. USD).
11:01, 12/07/2001
У 2001 годзе ў МУС рэспубліцы павінна прайсьці скарачэньне прыкладна 3-5 тысячаў працоўных месцаў. Пра гэта паведаміў грамадзкасьці міністар унутраных справаў Уладзімер Навумаў падчас свайго нядаўняга наведваньня сталічнага прадпрыемства “Керамін”. Аднак, па ягоных словах, скарачэньне тычыцца толькі работнікаў дапаможных міліцэйскіх службаў і адзьдзелаў, пераважна ў цэнтральным апараце ведамства, і ніяк не закране райадзьдзелы.
| |
|
, iнформэр
