Дэмсілы выйшлі на механізм вызначэньня адзінага кандыдата :: Хартыя'97 :: Навiны

Вядучыя дэмакратычныя й палітычныя партыі сумесна з рухам “За новую Беларусь” заявілі аб дасягненьні прынцыпіяльнай дамоўленасьці аб узгадненьні працэдуры выхаду на адзінага кандыдата ў прэзыдэнты Беларусі. Патэнцыйныя прэтэндэнты ў прэзыдэнты Рэспублікі Беларусь У.Ганчарык, С.Домаш, П.Казлоўскі, С.Калякін, М.Чыгір у адпаведнасьці з папярэднімі дамоўленасьцямі вызначаюць адзінага кандыдата ў прэзыдэнты да 19 ліпеня 2001 года. У выпадку рознагалосьсяў, канчатковае рашэньне аб адзіным кандыдаце ў прэзыдэнты выносіць папярэдне ўзгоднены з “пяцёркай” склад калегіі выбаршчыкаў у складзе 7 чалавек.

Калегія выбаршчыкаў не пазьней за 19 ліпеня вызначае адзінага кандыдата ад шырокай грамадзянскй кааліцыі кваліфікаванай болшасьцю, а таксама вызначае пэрсанальны рэйтынг кожнага члена “пяцёркі”. Пры наяўнасьці рознагалосьсяў унутры “пяцёркі” па складу калегіі выбаршчыкаў, ейны склад зацьвярджае шырокая грамадзянская кааліцыя.

Акрамя таго, дэмсілы ўзялі на сябе наступныя абавязацельствы ў вобласьці дзяржаўнага будаўніцтва: узнавіць дэмакратычную сыстэму ўлады ў краіне, заснаваную на прынцыпах падзелу ўладаў, вяршынства закону й парлямэнтарызму. Абмежаваць паўнамоцтвы прэзыдэнта, аднавіць функцыю парлямэнту, пашырыць паўнамоцтвы ўраду й мясцовых ворганаў улады. Гарантаваць незалежнасьць судовай ўлады й свабоду СМІ, забясьпечыць выбраньне парлямэнту і іншых прадстаўнічых ворганаў улады па зьмешанай прапарцыйна-мажарытарнай сыстэме, а фармаваньне ўраду парлямэнцкай большасьцю. Аднавіць поўны кантроль парлямэнту й мясцовых Саветаў за бюджэтамі, іншымі дзяржаўнымі фондамі й выкарыстаньнем дзяржаўнай маёмасьці, унесьці зьмены ў выбарчае заканадаўства, якое гарантуе фармаваньне выбарчых камісіяў на плюралістычнай аснове, неўмяшальніцтва ворганаў улады ў іхнюю дзейнасьць, непазьбежную крымінальную адказнасьць за парушэньне выбарчага закону; узяць курс на рэфармаваньне эканомікі на аснове ўліку як станоўчага, так і негатыўнага вопыту іншых дзяржаваў; ажыцьцяўляць эфектыўную шматвектарную зьнешнепалітычную дзейнасьць. Зыходны прынцып зьнешняй палітыкі – мост паміж Усходам і Захадам. Гарантаваць безумоўнае захаваньне канстытуцыйных палажэньняў аб суверэнітэце, незалежнасьці і імкненьню да нейтралітэту. Захоўваць цесныя, партнёрскія адносіны з Расеяй і іншымі краінамі СНД. Імкнуцца да інтэргрыраваньня ў агульнаэўрапейскую палітычную, эканамічную, гуманітарную прастору.