За парушэньні ў фармаваньні тэрытарыяльных камісіяў пагражае крымінальная адказнасьць :: Хартыя'97 :: Навiны

На стадыі фармаваньня тэрытарыяльных камісіяў па выбарах прэзыдэнта Беларусі Беларускі Гэльсінкскі камітэт выявіў мноства парушэньняў. Па фактах парушэньняў БГК зьвярнуўся ў пракуратуру з просьбаю ўзбудзіць па дадзеных фактах крымінальныя справы і прыцягнуць віноўных да адказнасьці; унесьці пратэсты на сумесныя рашэньні выканкамаў і прэзыдыюмаў Саветаў дэпутатаў па ўтварэньню адпаведных тэрытарыяльных камісіяў па прычыне грубых парушэньняў законнасьці.

БГК зьвярнуўся таксама да старшыні Цэнтральнай камісіі з просьбай прыняць вычарпляльныя меры па забесьпячэньні на ўсёй тэрыторыі Беларусі патрэбнага кантролю за выкананьнем заканадаўства аб выбарах па ўказаных у паведамленьнях фактах, правесьці праверкі й прыняць меры да ліквідацыі вынайдзеных парушэньняў.

У БГК пачынаюць паступаць вынікі пракурорскіх праверак згаданых фактаў парушэньня выбарчага й крымінальнага заканадаўства. Так, праверка пракуратуры Аршанскага раёну падцьвердзіла неправамоцнасьць сходу працоўнага калектыву Высакоўскага ПТВ №166 па вылучэньні кандыдата ў члены тэрытарыяльнай выбарчай камісіі. На сходзе, які вёў старшыня выканкаму, прысутнічала толькі траціна складу працоўнага калектыву, ня быў выбраны прэзыдыюм. Па сканчэньні сходу быў складзены ілжывы пратакол. Па выніках праверкі, праведзенай па завроце БГК, пракурор Аршанскага раёну накіраваў пратэсты на сумеснае рашэньне прэзыдыюму райсавету й райвыканкаму.