Загад на зьнічтажэньне Захаранкі, Ганчара й Красоўскага аддавалі Шэйман і Сівакоў :: Хартыя'97 :: Навiны

Не дачакаўшыся рэакцыі з боку Аляксандра Лукашэнкі, лідэр Федэрацыі прафсаюзаў Беларускай, патэнцыйны кандыдат у прэзыдэнты Ўладзімер Ганчарык перадаў у аўторак журналістам копіі матэрыялаў, якія даказваюць датычнасьць уладаў да дзейнасьці “эскадрону сьмерці”, які зьнічтажаў палітычных апанентаў Аляксандра Лукашэнкі. Сярод дакумэнтаў – рапарт генэрал-маёра Лапаціка на імя міністра ўнутраных справаў Навумава, у якім Лапацік сцьвярджае, што загад на зьнічтажэньне былога міністра ўнутраных справаў Юры Захаранкі далі асабіста глава Савету Бясьпекі Віктар Шэйман й міністар унутраных справаў Юры Сівакоў.

Яны загадалі выдаць пісталет, якім прыводзяцца ў выкананьне сьмяротныя пакараньні, кіраўніку спэцпадразьдзяленьня САХР Паўлючэнкі. Менавіта гэтым пісталетам, згодна рапарту Лапаціка, і было зьдзейсьнена “ідэальнае забойства” ня толькі Захаранкі, але й Ганчара, і Красоўскага. Трупы палітыкаў знаходзяцца на тэрыторыі спэцучастка на Паўночных могілках Менску.

У дакумэнтах, якія распаўсюдзілі Ўладзімер Ганчарык, ёсьць і копія рапарту начальніка СІЗА №1 Алкаева, якога дапытваў супрацоўнік пракуратуры Казакоў. Алкаеў падцьвярджае, што выдаў пісталет, якім выконваюцца сьмяротныя прысуды, менавіта ў тыя дні, калі ў Беларусі зьніклі Юры Захаранка, а пасьля Ганчар і Красоўскі. Алкаеў паведамляе, што кіраўнік САХРу Паўлючэнка прысутнічаў пры выкананьні сьмяротных прысудаў і пахаваньні трупаў забітых. Усё сказанае падцьвярджаюць й выпіскі з кнігі выдачы пісталету. Яны, а таксама копія зброі таксама фігуруюць у дакумэнтах.

“Я мяркую, што дадзеных дастаткова, каб адказаць на пытаньне: што-ж адбываецца ў нашай “славутай дзяржаве”? Ці ўлада – гэта злачынная група, якая распраўлялася з палітычнымі апанентамі такімі мэтадамі? Ці штосьці іншае? Ведаў Аляксандар Лукашэнка ці не ведаў – ён нясе за гэта адказнасьць. Адзіны доказ таго, што ўлада недатычна – вынайсьці ісьціну, а менавіта: хто вінаваты ў зьнікненьні людзей”, - заявіў Радыё Рацыя Уладзімер Ганчарык.

Копіі матэрыялаў, якія даказваюць датычнасьць уладаў да дзейнасьці “эскадрону сьмерці”, будуць апублікаваны на нашым сайце заўтра.