10 сутак арышту за ўдзел у акцыі ў Міжнародны дзень правоў чалавека :: Хартыя'97 :: Навiны

Лідэр брэсцкага адзьдзяленьня Маладога Фронту Сяржук Бахун учора быў асуджаны на дзесяць сутак арышту за ўдзел у акцыі, якая прайшла ў сьнежні мінулага года – у Міжнародны дзень правоў чалавека. Тады міліцыянты затрымалі пяць чалавек, якія пазьней былі пакараны адміністратыўнымі штрафамі. У прыватнасьці, кіраўнік брэсцкага азьдзяленьня Маладога Фронту павінен быў заплаціць штраф у памеры 200 мінімальных заробкаў.

Паколькі Бахун гэтага не зрабіў, да яго на кватэру прыйшлі судовыя выканальнікі, каб апісаць маёмасьць. Гэты візыт ня быў пасьпяховым, паколькі бацькі Сяржука Бахуна заявілі, што ў доме няма маёмасьці, якая належыць іхняму сыну. У выніку справа маладафронтаўца зноў трапіла ў суд Ленінскага раёну Брэста і судзьдзя Алег Міранюк учора прыняў рашэньне пакараць Бахуна на дзесяць сутак арышту.

Да гэтага варта дадаць, што перасьлед адбываецца і адносна бацькоў Сяржука Бахуна, якіх пазбавілі працы на адказных пасадах у аб’яднаньні «Брэстгароднiнапрам». Пётар Бахун, нават знайшоўшы іншую працу атрымоўвае заўвагі зараз ужо ад новага начальства. Як паведамляе Радыё Свабода, гэта зьвязана з тым, што бацька мясцовага кіраўніка Маладога Фронту прымае ўдзел у кампаніі збору подпісаў за вылучэньне апазыцыйных кандыдатаў у прэзыдэнты.