Жонак зьніклых беларускіх палітыкаў прынялі на вышэйшым узроўні ў Дзярждэпартамэнце ЗША :: Хартыя'97 :: Навiны

Тэлемост з удзелам жонак рэпрэсаваных беларускіх палітыкаў Людмілай Карпенка, Ірынай Красоўскай, Сьявятланай Завадзкай і Тацянай Клімавай, якія знаходзяцца на дадзены момант у Вашынгтоне, дзе ў іх прайшлі сустрэчы ў Дзярждэпартамэнце ЗША, быў арганізаваны ўчора ў Амбасадзе ЗША ў Менску. Яны прыбылі ў Вашынгтон для таго, каб заявіць аб неабходнасьці незалежнага расьсьледаваньня іхніх мужоў. Чатыры беларускія жанчыны, чые мужы сталі ахвярамі палітычнага рэжыму, заявілі ўчора са студыі Дзярждэпу ЗША: “Мы звычайныя жанчыны, якія жылі з мужамі і з палітыкаю сутыкаліся ўскосна. Але зараз мы хочам, каб нас заўважылі. Чацьвёра вядомых апанентаў Лукашэнкі бяз зьвестак зьніклі пачынаючы з 1999 г. Да гэтага часу беларускія ўлады так і не пралілі сьвятло на гэтыя зьнікненьні. Мы хочам, каб міжнародная грамадзкасьць прымусіла беларускія ўлады правесьці расьсьледаваньні зьнікненьняў і забойстваў нашых мужоў”.

Людміла Карпенка, Ірына Красоўская, Тацяна Клімава й Сьвятлана Завадзкая паведамілі беларускім журналістам, што 17 ліпеня зь імі сустрэўся памочнік Дзяржсакратара па праблемах дэмакратыі, правоў чалавека й працы Лорн Крэйнэр. Група таксама сустрэлася з намесьнікам памочніка Дзяржсакратара па эўрапейскіх пытаньнях Сцівенам Піферам і афіцыйнымі асобамі Нацыянальнага Савету Бясьпекі.

У Белым Доме жанчын сустрэў Камерон Мінтан, дырэктар па Цэнтральнай Эўропе ў Савеце нацыянальнай бясьпекі і Мары Андрус, дырэктар па дэмакратыі і правох чалавека Савету нацыянальнай бясьпекі.

Жонкі рэпрэсаваных беларускіх палітыкаў сустрэліся з кангрэсмэнамі, у прыватнасьці сустаршынёй Камісіі па бясьпецы й супрацоўніцтву ў Эўропе Дароці Тафф. Прайшлі сустрэчы з сенатарамі: Джэсі Хэлмсам, былым старшынёй Камісіі па міжнародных справах у Сенаце, і сенатарам Кэмбэллам, сустаршынёй Камісіі па бясьпецы й супрацоўніцтву ў Эўропе.

Жанчыны далі інтэрвію агенцтву Рэйтэр, правялі прэс-канферэнцыю на Радыё Свабода і ў Міжнародным Рэспубліканскім Інстытуце.

Па словах Людмілы Карпенкі, Злучаныя Штаты застаюцца вельмі занепакоенымі сэрыяй палітычных рэпрэсыяў, навязаных рэжымам Лукашэнкі. ЗША вельмі сур’ёзна аднеслася да дакумэнтаў, якія сьведчаць аб датычнасьці да зьнікненьняў вышэйшага кіраўніцтва рэжыму Лукашэнкі і заявілі, нібы ўся адказнасьць за зьнікненьне й забойства чатырох прадстаўнікоў апазыцыі нясе так званы “эскадрон сьмерці”, створаны рэжымам.

Што да стварэньня незалежнай міжнароднай камісіі па расьсьледваньню загадкавых зьнікненьняў і сьмерцяў вядомых у Беларусі людзей, то прысутная ўчора ў студыі Дзярждэпартамэнту выканаўчы дырэктар міжнароднай Лігі правоў чалавека Кэці Фіцпатрык паведамілі наступнае: “Мы хочам стварыць такую камісію. Магчыма яна будзе нефармальнай. А будзе складацца зь людзей добрай волі з розных краінаў сьвету. Мы паспрабуем стварыць міжнародныя грамадзкія камітэты, куды будуць уваходзіць і прадстаўнікі нашай арганізацыі”.