Грамадзкія дзеячы Беларусі даюць высокую адзнаку рашэньню аб вылучэньні адзінага кандыдата :: Хартыя'97 :: Навiны

Шэраг беларускіх грамадзкіх дзеячаў пракамэнтавалі па просьбе БелаПАН абнародаванае 21 ліпеня рашэньне "пяцёркі" прэтэндэнтаў на пасаду прэзыдэнта Беларусі ад шырокай грамадзянскай кааліцыі аб вылучэньні адзіным кандыдатам Уладзімера Ганчарыка. "Сёьнняшнім рашэньнем з усіх нас зьняты вялікі цяжар, — заявіў былы сьпікер Вярхоўнага Савету Беларусі Станіслаў Шушкевіч. — Мы павінны цяпер аб`яднацца і ўсе разам працаваць на чалавека, якому "пяцёрка" даверыла быць першым. Я заклікаю актывістаў усіх апазыцыйных партыяў адкінуць партыйныя і асабістыя амбіцыі і дружна працаваць на Уладзімера Іванавіча Ганчарыка".

Народны паэт Беларусі Ніл Гілевіч назваў сёньняшняе рашэньне "пяцёркі" "грамадзянскім подзьвігам". Ён выказаў упэўненасьць у тым, што прадстаўнікі дэмакратычнага руху Беларусі змогуць выйграць прэзыдэнцкія выбары. Ніл Гілевіч назваў прынятае рашэньне "вельмі добрым рашэньнем людзей, для якіх на першым месцы апынуліся не асабістыя амбіцыі, а гонар краіны".

Старшыня аргкамітэта руху "За новую Беларусь" Васіль Лявонаў сказаў, што ён "шчаслівы сёньня адчуваць сябе беларусам". Некаторыя цяперашнія кіраўнікі Беларусі, адзначыў ён, называюць беларускі народ "быдлам". "Сёньня я яшчэ раз упэўніўся, што беларускі народ — гэта годныя і паважаныя людзі", — сказаў Васіль Лявонаў.