Уладзімер Ганчарык: Мы аб’ядноўваемся, ствараем адзіны штаб, куды ўвойдуць лепшыя людзі :: Хартыя'97 :: Навiны

Адзіны кандыдат у прэзыдэнты ад шырокай народнай кааліцыі Уладзімер Ганчарык даў сваё першае інтэрвію газэце “Наша Свабода”.

- Уладзімер Іванавіч, як скончыліся кансультацыі “пяцёркі”?

- Выбралі й прызначылі адзінага. Рашэньне адбылося адназначна. Гэта Ганчарык.

- Якімі крытэрамі “пяцёрка” кіравалася пры прызначэньні Вас у якасьці адзінага прэтэндэнта?

- Я скажу, што трохслойнымі прынцыпамі. Справа ў тым, што ацанілі літаральна па ўсіх парамэтрах: сам сябе, свае рэсурсы, свае рэйтынгі, плюсы, мінусы, дынаміку. Калегі выказаліся. Быў руплівы аналіз.

- Ці варта разумець, што чацьвёра вашых калегаў сыходзяць з дыстанцыі? Ці застаюцца?

- Не, яны застаюцца. Тыя, хто мае подпісы, йдуць на рэгістрацыю. Ёсьць цьвёрдая дамоўленасьць аб тым, што калі будзе зарэгістраваны адзіны, яны здымаюць свае кандыдатуры й будуць працаваць у камандзе паверанымі асобамі са сьлед ідучай працай у структурах улады.

- На якіх прынцыпах Вы дамовіліся працаваць са сваімі калегамі?

- Мы аб’ядноўваемся, ствараем адзіны штаб, куды ўваходзяць лепшыя людзі. Вызначаем накірункі працы, кожны атрымоўвае канкрэтны участак і працуем на адзіную мэту. Усе гэтыя дамоўленасьці практычна дасягнутыя.

- Прайшла інфармацыя, што Домаш у выпадку Вашай перамогі на прэзыдэнцкіх выбарах атрымоўвае пост прэм’ера...

- Папярэдне ўсё расьпісана. Расьпісаны й дублёр, і будучыня – як у любым палітычным штабе. Але ня гэта асноўнае. Галоўнае сёньня, як вы разумееце, дасягнуць мэты, што значыць наладзіць сумесную працу пасьля рэгістрацыі.