На магілёўскіх прадпрыемствах склалася перадзабастовачная сытуацыя :: Хартыя'97 :: Навiны

Ужо тры месяцы, нягледзячы на абяцаньні кіраўніцтва прадпрыемства і Магілёўскага гарвыканкаму, не выплочваецца заробак на Магілёўскім гарадзкім камунальным вытворчым унітарным прадпрыемстве “Машыныбудаўнічы завод”. У калектыве склалася перадзабастовачная сытуацыя. І праз тое, што звароты ва ўсе кіруючыя інстанцыі не даюць вынікаў, рабочыя адмаўляюцца прыступаць да працы.

Па-ранейшаму цяжкое становішча застаецца з выплатай заробку і на іншых прадпрыемствах аўтасельгасмашу, паведамляе прэсавы цэнтар галіновага прафсаюзу. На Смаргонскім агрэгатным заводзе яшчэ не прыступалі да выплаты заробку за травень. На асобных прадпрыемствах (Смалявіцкі механічны завод) існуе запазычанасьць па заробку ІТР і служачых. На многіх прадпрыемствах, у прыватнасьці, Бабруйскім ААТ “ТаіМ”, Гомельскім ЗліНЕ. Магілёўскім аўтазаводзе, па стану на 24 ліпеня заробак яшчэ не выплочваўся за чэрвень.

На шэрагу прадпрыемстваў – “Бабруйскаграмашы”, “Лідсельмашы” – выплачана толькі дапамога ад голаду – так званыя “кошыкі”. На МАЗе, МТЗ, МПЗ і іншых выплачана толькі палова заробку за чэрвень. Прадпрыемствы вымушаны браць крэдыты ў камэрцыйных банках пад высокія працэнты для выплаты заробку, што яшчэ больш ускладняе іхняе фінансавае становішча. Нагадаем, на 30 чэрвеня запазычанасьць па прамысловасьці склала 2257,7 млн. рублёў.