Міхаіл Марыніч сыходзіць у адстаўку з дыпляматычнай пасады :: Хартыя'97 :: Навiны

Міхаіл Марыніч здымае з сябе паўнамоцтвы Надзвычайнага і Паўнамоцнага пасла Рэспублікі Беларусь у Латвіі і, па сумяшчальніцтву, у Эстоніі й Фінляндыі. Пра гэта М.Марыніч заявіў 25 ліпеня на сустрэчы з журналістамі.

У заяве М.Марыніча на імя віцэ-прэм`ера — міністра замежных справаў Беларусі Міхаіла Хвастова гаворыцца: "Не лічачы магчымым апраўдваць сыстэму дыктату, дэградацыю эканомікі, якая вядзе да галечы людзей, знікненьне палітыкаў, сталае парушэньне правоў і свабод грамадзянаў, міжнародную ізаляцыю Беларусі, я ўступіў ў выбарчую кампанію па выбарах прэзыдэнта краіны. На жаль, ход кампаніі паказвае, што выбары ня могуць быць сумленнымі і празрыстымі, калі ўлада, не зважаючы на мэтады, ліквідуе непажаданых кандыдат. Нягледзячы на жорсткі ціск, я лічу неабходным працягваць актыўную палітычную дзейнасьць на карысьць дэмакратычных пераўтварэньняў Беларусі. Я здымаю з сябе паўнамоцтвы і прашу прыняць маю адстаўку".

М.Марыніч ня выключыў, што ў выпадку адмове ў рэгістрацыі яго кандыдатам у прэзыдэнты, ён возьме ўдзел у працы на адзінага кандыдата ад шырокай грамадзянскай кааліцыі — лідэра Федэрацыі прафсаюзаў Беларускай Уладзімера Ганчарыка. Ён таксама заклікаў усіх "людзей цьвярозага розуму" падтрымаць адзінага дэмакратычнага кандыдата на маючых адбыцца выбарах.

Па зьвестах Цэнтрвыбаркаму, для вылучэньня М.Марыніча кандыдатам у прэзыдэнты не хапае каля 4 тысяч подпісаў (пры неабходных 100.000 подпісах). Аднак сам прэтэндэнт зцьвярджае, што на выбарчыя ўчасткі перададзена 110.000 подпісаў у яго падтрымку. Разам з тым, даказваць сваю праўдзівасьць М.Марыніч будзе, па ягоных словах, толькі ў тым выпадку, калі зьбярэ дастатковую пераканаўчую базу.