Рэпрэсіі супраць ЗУБРа ў Дзень Незалежнасьці :: Хартыя'97 :: Навiны

Больш за два дзесяткі актывістаў моладзевага руху супраціву ЗУБР былі затрыманы 27 ліпеня. Пры затрыманьні маладых людзей зьбівалі людзі ў штацкім. Затрыманыя былі дастаўлены ў Цэнтральны й Партызанскі РУУС Менску, а таксама ў апорны пункт аховы правапарадку на плошчы Перамогі. Адразу пасьля затрыманьня хлопцаў у апорным пункце пачалі зьбіваць. Скончылася зьбіцьцё толькі пасьля прыезду журналістаў і праваабронцаў.

У Цэнтральным РУУС на сямёх непаўнагадовых склалі пратакол па арт.167 КаАП, пасьля чаго іх адпусьцілі. Прыкладна 13 непаўнагадовых удзельнікаў акцыі з рэгіёнаў утрымліваюцца там да гэтага часу. Іх згодны адпусьціць толькі пад расьпіску бацькоў, а паколькі бацькоў у гэтым горадзе няма, ня выключана, што іх адправяць у спэцпрыёмнік-разьмеркавальнік на вул.Акрэсьціна. Акрамя таго, там утрымоўваецца 5 непаўнагадовых зуброў, якім па ідэі павінны ўручыць позвы ў суд і адпусьціць. Акрамя таго, там знаходзяцца 5 паўнагадовых зуброў, якім па ідэі павінны ўручыць позвы ў суд і адпусьціць. Але канчатковы іхні лёс таксама невядомы, таму што ня выключана, што хлопцам прыдзецца правесьці выходныя на Акрэсьціна ў чаканьні суда.

У судзе Партызанскага раёну ўжо пасьпеў прайсьці суд над Вольгай Карач. Яе абвінавачвалі ў парушэньні арт.166 КаАП (непадпарадкаваньне супрацоўнікам міліцыі) але падчас суда абвінавачваньне перакваліфікавалі ў арт. 156 КаАП (дробнае хуліганства) і, прысудзіўшы штраф 1 МЗ, адпусьцілі.