Дэлегацыя ПАСЭ сустрэлася з “пяцёркай” дэмкандыдатаў :: Хартыя'97 :: Навiны

Другі дзень знаходжаньня ў Менску дэлегацыі Парлямэнцкай асамблеі Савету Эўропы (ПАСЭ) пачаўся з рабочай сустрэчы з “пяцёркай” патэнцыйных кандыдатаў у прэзыдэнты Рэспублікі Беларусь ад шырокай грамадзянскай кааліцыі – Уладзімерам Ганчарыкам, Сямёнам Домашам, Сяргеям Калякіным, Паўлам Казлоўскім і Міхаілам Чыгіром, а таксама кіраўніком выбарчай кампаніі адзінага кандыдата Васілём Лявонавым.

Як паведаміў БелаПАН Павал Казлоўскі, кандыдаты распавялі дэлегацыі пра свае праблемы. У прыватнасьці, усе пяцёра заявілі, што кожны зь іх сабраў і перадаў у Цэнтрвыбаркам больш за сто тысячаў подпісаў, аднак ЦВК лічыць, шо неабходную мяжу пераадолелі толькі двое – Домаш і Ганчарык. Усе кандыдаты падцьвердзілі рашучасьць да супрацоўніцтва ў рамках “пяцёркі” і заявілі пра сваю гатоўнасьць, як і раней, ва ўсім дапамагаць адзінаму кандыдату ад шырокай грамадзянскай кааліцыі.

Шмат увагі ў размове надзялялася праблемам адносінаў ўладаў і палітычнай апазыцыі. Актуальным повадам для такой размовы стаў паказаны вечарам 31 ліпеня па Беларускай тэлевізыі выступ Аляксандра Лукашэнкі на паседжаньні з прадстаўнікамі мясцовых уладаў. На думку “пяцёркі”, дзейны глава дзяржавы ў чарговы раз вядзе ў дзяржаўных СМІ сваю прадвыбарчую кампанію. У той самы час на астатніх патэнцыйных кандыдатаў з эфіру беларускага тэлебачаньня і іншых мас-медыя ліюцца патокі бруду. Магчымасьці выступіць з абвяржэньнем дэзынфармацыі яны не маюць.