34 дэклярацыі на чацьвярох патэнцыйных прэзыдэнтаў :: Хартыя'97 :: Навiны

налічыў карэспандэнт “Нашай свабоды”. Лукашэнка, па словах кіраўніка ягонай ініцыятыўнай групы Мікалая Чаргінца, здаў сем дэклярацыяў – на сябе, жонку, маці, цешчу, двух сыноў і ўнучку. Пра памер даходаў Лукашэнкі Чаргінец ня стаў казаць, магчыма, таму, што Лукашэнка цалкам знаходзіцца на дзяржаўным забесьпячэньні.

Першым усе фармальнасьці выканаў Гайдукевіч. Яшчэ 25 ліпеня ён перадаў у ЦВК заяву са згодаю балятавацца кандыдатам у прэзыдэнты, аўтабіяграфію, дэклярацыю аб даходах на сябе і на сем сваякоў: жонку, дачку, сына, унучку, маці, бацьку й цешчу. Ён таксама заявіў пра гатоўнасьць перадаць прэсе зьвесткі аб даходах.

2 жніўня Сямён Домаш падаў у ЦВК дэклярацыю аб даходах і маёмасьці, а таксама дэклярацыю на жонку, двух сыноў і ўнука, якія жывуць разам зь ім у Гародні, а таксама на маці, сястру й брата – жыхароў Баранавічаў і на цешчу з Гомельскай вобласьці. Больш за ўсё цяжкасьцей было з дэклярацыяй цяжка хворай цешчы. Згодна дэклярацыі, Домаш мае аўтамабіль “Аўдзі”, сумесна з жонкаю валодае жылым домам ў Гародні садовым участкам на 8 сотак і садовым домікам. Гадавы даход склаў 256 тысячаў рублёў. Асобны пункт дэклярацыі – жылы дом у Гародні. Ён быў выкуплены Домашам у сакавіку 1994 года. Аднак пасьля рэферэндуму 1996 года, калi ягоны ўладальнік паставіў подпіс пад патрабаваньнем імпічмэнту Лукашэнкі, Ленініскі раённы суд прызнаў дамову куплі-продажу несапраўднай. Судовая эпапея цягнецца да сёньня.

Уладзімеру Ганчарыку прыйшлося сабраць 11 дэклярацыяў – ня сябе, на жонку, дачку, сына, трох унукаў, маці, брата й дзьвюх сясьцёр. Па асноўным месцы працы даходы за мінулы год склалі каля 2,5 млн. рублёў, за прададзеную “Волгу” – 1300 тыс.рублёў, за прададзены гараж – 1100 тысячаў. На ўсялякі выпадак Ганчарык задэкляраваў даход з адной лекцыі (5 тысячаў рублёў) і тры падарункі да юбілею. Рэгістрацыя кандыдатаў павінна скончыцца 15 жніўня.