Палкоўнік Алкаеў баіцца за сваё жыцьцё :: Хартыя'97 :: Навiны

Жонка былога начальніка Менскага сьледчага ізалятара Алега Алкаева Ірына не падцьвердзіла зьвестак пра тое, што ейны муж эмігрыраваў у Нямеччыну. Як паведаміла Радыё Свабода, па словах Ірыны Алкаевай, ужо больш за месяц ейны муж знаходзіцца ў сваякоў Расеі, і яна ня мае зьвестак пра тое, што ён адтуль кудысьці зьехаў. Галоўнай прычынай ад’езду ў Расею Алега Алкаева ягоная жонка назвала апасеньне за жыцьцё.

Нагадаем, што прозьвішча Алкаева стала вядомым беларускай грамадзкасьці пасьля агучваньня Ўладзімерам Ганчарыка дадатковых дакумэнтаў аб існаваньні ў краіне так званага “эскадрону сьмерці”.

Ганчарык тады прадставіў рапарты генэрала міліцыі Лапаціка і палкоўніка Алкаева, якія ўтрымлівалі ускосныя доказы злачыннай дзейнасьці гэтага фарміраваньня. У прыватнасьці, Алег Алкаеў падцьвярджаў, што камандзір САХРу Паўлючэнка атрымоўваў у карыстаньне пісталет, зь якога забіваюць асуджанных на сьмерць злачынцаў. Пры гэтым дні, калі гэты пісталет трапляў да Паўлючэнкі, супалі з днямі зьнікненьня Юры Захаранкі, Віктара Ганчара й Анатоля Красоўскага.

Яшчэ да агалошаньня гэтых матэрыялаў Алкаеў зьехаў зь Беларусі. Падобна на тое, што ён не зьбіраецца ў хуткім часе вяртацца. На мінулым тыдні жонка Алкаева Ірына ад ягонага імя падала рапарт аб звальненьні, што падцьвердзілі ў Міністэрстве ўнутраных справаў.