У Беларусі знайшлі “тэрарыста” :: Хартыя'97 :: Навiны

Працягваецца сьледзтва па факту выбуху на тэрыторыі расейскай амбасады ў Менску ўначы 31 траўня. У якасьці галоўнага падазронага сьледчая група КДБ назвала ў канцы мінулага тыдня члена моладзевага крыла Беларускага народнага фронту 17-гадовага Івана Тамашэвіча. Нагадаем, што інцыдэнт адбыўся напярэдадні прыбыцьця ў беларускую сталіцу на саміт главаў дзяржаваў СНД расейскага прэзыдэнта Ўладзімера Пуціна.

Аляксандар Лукашэнка ўзяў справу пад асабісты кантроль і даручыў вядзеньне справы КДБ Беларусі. Дастаткова хутка высьветлілася, што непасрэднымі выканальнікамі акцыі былі два маладых чалавека. Прыкладна а палове ночы яны кінулі выбухоўку праз сьцяну амбасады й зьбеглі.

Прэс-сакратар КДБ Фёдар Котаў заявіў: “На дадзены момант існуе некалькі рабочых версыяў. Адна зь іх дапускае датычнасьць да арганізацыі выбуху членаў моладзевай экстрэмісцкай арганізацыі”. Інтэрвію лідэра моладзевага крыла БНФ Паўла Севярынца ў адной зь беларускіх газэтаў прыцягнула ўвагу сьледчых і стала падставаю для ягонага допыту. За ім на допытах у КДБ пабывалі каля паўтары дзесяткі моладзевай арганізацыі. Ейныя прадстаўнікі сцьвярджаюць, што “ніякім чынам не зьвязаны з выбухам ля амбасады Расеі”, і ўпэўненыя, што “выклікі на допыт адбываюцца для таго, каб запужаць маладых апазыцыянэраў і прыпыніць іхнюю дзейнасьць падчас выбарчай прэзыдэнцкай кампаніі ў краіне”.