Пошукі тэрарыстаў працягваюцца :: Хартыя'97 :: Навiны

9 жніўня Слонімскі адзьдзел КДБ выклікаў актывіста ЗУБРа Алеся Масюка. Яму прыслалі позву без указаньня мэты выкліку. Высьветлілася, што слонімскія “гэбісты” шукаюць тэрарыстаў. У КДБ з Алесем Масюком размаўлялі начальнік гарадзкога адзьдзелу КДБ Алег Лаўрэнка й супрацоўнік Камітэту Ігар Рудакоў. У хлопца пыталі, дзе ён знаходзіўся падчас выбуху на тэрыторыі расейскай амбасады ў Менску ў апошні дзень траўня, што ён ведае пра гэты выбух, як адносіцца да палітычнага экстрымізму.

Раней з такой мэтаю ў Слонімскае КДБ выклікалі жыхара вёскі Сялявічы Генрыха Засімовіча, які ўваходзіць у БНФ.

У Гародні на такую тэму супрацоўнікі КДБ дапытвалі журналіста газэты “Пагоня” Паўла Мажэйку. Газэта надрукавала два месяцы таму заяву нейкай “Рады камандзіраў Беларускай нацыянальнай самаабароны”, а таксама крытычны матэрыял наконт міжпарлямэнцкай сэсіі “саюзу” Расеі й Беларусі, што адбылася ў Гародні. У заяве гучала папярэджаньне маскоўскім і менскім дэпутатам.

Гэтыя публікацыі КДБ разглядае ў адным шэрагу з выбухам у расейскай амбасадзе. КДБ цікавілася, ці існуе насамрэч гэтая “Рада камандзіраў”, ці могуць быць у Гародні людзі, здольныя кінуць выбухоўку ў расейскую амбасаду. Журналіст палічыў размову спробаю запужваньня і вярбоўкі. Між іншым, за вышэйзгаданыя публікацыі вабласная пракуратура ўзбудзіла супраць “Пагоні” крымінальную справу.