Вобыск у штабе Сямёна Домаша. Канфіскавана ўся дакумэнтацыя й аргтэхніка :: Хартыя'97 :: Навiны

Незаконны вобыск у гарадзенскім штабе патэнцыйнага кандыдата ў прэзыдэнты старшыні гарадзенскай арганізацыі “Ратуша” правялі сёньня ў Гародні супрацоўнікі адзьдзелу па барацьбе з эканамічнай злачыннасьцю. Ня гледзячы на тое, што АБЭЗ ня меў санкцыяў на вобыск у офісе аб’яднаньня “Ратуша”, у штабе Домаша была канфіскаваная дакумэнтацыя, кампутары і ўся аргтэхніка. Супрацоўнікі адзьдзелу па барацьбе з эканамічнай злачыннасьцю не патлумачылі сваіх супрацьпраўных дзеяньняў.

Больш за тое, намесьнік начальніка адзьдзелу па барацьбе з эканамічнай злачыннасьцю Сяргей Буч, які непасрэдна кіраваў вобыскам і канфіскацыяй аргтэхнікі, паводзіў сябе па-хамску і заявіў, “что ничего объяснять не собирается, так как, если он не прав, меня поправит прокуратура». Зразумела, што спадзявацца ў дадзеным выпадку на пракуратуру, якую ўзначальвае блізкі паплечнік Лукашэнкі Віктар Шэйман, не варта...

У сваіх дзеяньнях супрацоўнікі АБЭЗ спасылаліся толькі на дэкрэт №8, які нібыта дазваляе ім рабіць вобыскі ў грамадзкіх арганізацыях і высьветліць іхнія фінансавыя крыніцы існаваньня.

У Гародню тэрмінова выехаў кіраўнік гэтага грамадзкага аб’яднаньня Аляксандар Мілінкевіч. Сам Сямён Домаш знаходзіцца ў Менску. Ён мае намер зьвярнуцца ў Цэнтрвыбаркам з адпаведнаю скаргаю.