Прадпрыемствам прадаставілі адтэрміноўку для пагашэньня запазычанасьцяў :: Хартыя'97 :: Навiны

Урад прадаставіў пяці прадпрыемствам Беларускага дзяржаўнага канцэрну па вытворчасьці й рэалізацыі тавараў лёгкай прамысловасьці адтэрміноўку па пагашэньні запазычанасьці за энэргарэсурсы.

У адпаведнасьці з прынятай пастановай адтэрміноўка да 31 сьнежня 2002 года па пагашэньні ўтворанай на 1 ліпеня гэтага года запазычанасьці прадастаўлена рэспубліканскаму унітарнаму прадпрыемству "Баранавіцкае вытворчае баваўнянае аб`яднанне", арэнднаму вытворча-гандлёваму прадпрыемству "Аршанскі льнокамбінат", рэспубліканскаму унітарнаму вытворчаму прадпрыемству "Крычаўскі завод гумавых вырабаў імя 50-годдзя БССР", ААТ "Пінскае прамыслова-гандлёвае аб`яднанне "Палессе" і ААТ "Віцебскія дываны".

Пагашэньне запазычанасьці павінна будзе праводзіцца з 1 студзеня па 31 сьнежня 2002 года штомесяц роўнымі долямі з улікам каэфіцыэнту зьмены афіцыйнага курсу даляру ЗША, устаноўленага Нацбанкам на дзень плацяжу, да афіцыйнага курсу даляру, устаноўленага НБ на 1 ліпеня 2001 года, без налічэньня пені.

Згодна з урадавай пастановаю, газа- і энергазабясьпечваючым прадпрыемствам, што ўваходзяць у склад Беларускага канцэрну па паліву й газіфікацыі й Беларускага дзяржаўнага энэргетычнага канцэрну, прадастаўлена адтэрміноўка па пагашэньні запазычанасьці за прыродны газ, выкарыстаны для вытворчасьці электрычнай і цеплавой энэргіі, пастаўленай згаданым прадпрыемствам канцэрна лёгкай прамысловасьці; віцебскаму рэспубліканскаму унітарнаму прадпрыемству "Віцебскэнерга" - за прыродны газ, выкарыстаны для вытворчасьці электрычнай энэргіі, адпушчанай арганізацыям канцэрна лёгкай прамысловасьці.