Улады так і не накіравалі запрашэньні БДІПЧ АБСЭ :: Хартыя'97 :: Навiны

Міністэрства замежных справаў Беларусі да гэтага часу не накіравала Бюро па дэмакратычных інстытутах і правох чалавека АБСЭ запрашэньне накіраваць назіральнікаў на прэзыдэнцкія выбары ў Беларусь. Пра гэта 13 жніўня БелаПАН паведаміў прэс-сакратар МЗС Павал Латушка, які ў чарговы раз паабяцаў, што запрашэньне будзе накіравана “ у хуткім часе”. Але накіраваць запрашэньні БДІПЧ “ у хуткім часе” яшчэ 8 жніўня на сустрэчы з журналістамі паабяцаў Аляксандар Лукашэнка. А 9 жніўня пра гэта заявіла прадстаўнікам СМІ глава ЦВК Лідзія Ярмошына. Яна, у прыватнасьці, сказала, што запрашэньне БДІПЧ АБСЭ будзе накіравана напрацягу "одного-двух дней".

Як вядома, БДІПЧ зьяўляецца спэцыялізаванаю структураю АБСЭ, якая ажыцьцяўляе і каардынуе міжнароднае назіраньне за выбарамі ў краінах, якія ўваходзяць у гэтую арганізацыю. Кіраўніцтва БДІПЧ ужо выказала на днях сваю занепакоенасьць адсутнасьцю афіцыйнага запрашэньня ад беларускага боку. У прыватнасьці, у краіну пакуль ня могуць трапіць тыя прадстаўнікі гэтай структуры, якія ў адпаведнасьці са стандартамі сваёй арганізацыі павінны пачынаць доўгатэрміновае назіраньне за шэсьць тыдняў да даты выбараў. Адсутнасьць на выбарах назіральнікаў БДІПЧ азначае, па сутнасьці, прынцыповае непрызнаньне вынікаў выбараў з боку заходніх краінаў і эўрапейскіх арганізацыяў.