Формула перамогі ажыцьцяўляецца: Домаш і Ганчарык падпісалі адкрытае пагадненьне :: Хартыя'97 :: Навiны

Пасьля доўгага абмеркаваньня, са спазьненьнем на некалькі гадзінаў, за якія, тыя, хто прыйшоў на ўрачыстае падпісаньне пагадненьня паміж адзіным кандыдатам і шырокай грамадзянскай кааліцыяй, літаральна штурмавалі памяшканьне, дзе адбывалася нарада паміж двума патэнцыйнымі кандыдатамі ў прэзыдэнты і прадстаўнікамі палітычных партыяў і рухаў, а актывісты руху ЗУБР скандавалі “Адзінага!”, “Жыве Беларусь!”, урачыстае падпісаньне пагадненьня, нарэшце, адбылося. Галоўным вынікам сёньняшняга дня стала канчатковае рашэньне двух патэнцыйных кандыдатаў у прэзыдэнты Уладзімера Ганчарыка і Сямёна Домаша ісьці на выбары ўдвух. Пасьля рэгістрацыі Сямён Домаш, як і меркавалася, здымае сваю кандыдатуру на карысьць Уладзімера Ганчарыка, атрымоўваючы назамен гарантыі, што пасьля перамогі на выбарах адзінага кандыдата займае пост прэм’ер-міністра Беларусі.

Пасьля рэгістрацыі Ўладзімера Ганчарыка кандыдатам у прэзыдэнты Сямён Домаш становіцца кіраўніком палітычнага савету штаба адзінага кандыдата.

У выпадку рэгістрацыі толькі аднаго прэтэндэнта ў кандыдаты ўсе ўдзельнікі гэтага пагадненьня аказваюць яму ўсемагчымую падтрымку як адзінаму кандыдату ад шырокай грамадзянскай кааліцыі.

У выпадку стварэньня правячым рэжымам перашкодаў для рэгістрацыі Ганчарыка, аб’яднаны штаб і абодва прэтэндэнты ў кандыдаты, прымаюць усе законныя меры для забесьпячэньня рэгістрацыі адзінага кандыдата, аж да звароту ў міжнародныя арганізацыі й правядзеньня масавых акцыяў пратэсту.

Уладзімер Ганчарык прымае на сябе абавязацельствы ў выпадку выбраньня яго на пост прэзыдэнта сфармаваць урад на чале з Домашам, а таксама ў мінімальныя тэрміны перадаць частку прэзыдэнцкіх паўнамоцтваў у рамках агульнага працэсу падзелу ўладаў ўраду. Адзіны кандыдат таксама абавязуецца правесьці дэмакратычныя парлямэнцкія выбары. Што да дзяржаўнага ўраду, то адзіны кандыдат абавязуецца гарантаваць ўзнаўленьне дэмакратычнай сыстэмы ўраду ў краіне, заснаванай на прынцыпах падзелу ўладаў, вяршынства закону й парлямэнтарызму, абмежаваньне паўнамоцтваў прэзыдэнта, узнаўленьне функцыяў парлямэнту, пашырэньне паўнамоцтваў і ворганаў мясцовага самакіраваньня, незалежнасьць судовай улады і свабоду СМІ , у тым ліку стварэньне грамадзкага тэлівізыйнага каналу, забясьпечыць выбраньне парлямэнту й мясцовых прадстаўнічых ворганаў ўлады па зьмешанай, прапарцыйнай і мажарытарнай сыстэме й зацьвярджэньне ўраду парлямэнтам.

Гарантаваць аднаўленьне поўнага кантролю парлямэнту й ворганаў мясцовага самакіраваньня за бюджэтамі і іншымі дзяржаўнымі фондамі. Забясьпечыць ўнясеньне зьменаў выбарчага заканадаўства, якое гарантуе фармаваньне выбарчых камісіяў з удзелам палітычных партыяў і грамадзкіх аб’яднаньняў, неўмяшальніцтва ворганаў улады ў іхнюю дзейнасьць. Узяць курс на забесьпячэньне дынамічнага разьвіцьця эканомікі, пад’ём жыцьцёвага ўзроўню насельніцтва, гарантаваць безумоўнае выкананьне канстытуцыйных палажэньняў аб суверэнiтэце, незалежнасьці і імкненьні да нейтралітэту. Ажыцьцяўляць эфектоўную зьнешнепалітычную дзейнасьць, асноўным прынцыпам якой зьяўляецца замацаваньне сумленных, узаемавыгадных партнёрскіх зносінаў з Расеяй, Украінаю і іншымі краінамі, забясьпечыць інтэграцыю Беларусі ў агульнаэўрапейскую палітычную, эканамічную прастору. Стварыць спрыяльныя ўмовы для разьвіцьця нацыянальнай культуры, мовы, традыцыяў і прымяненьня нацыянальнай гістарычнай сымболікі беларускага народу.

Лідэры палітычных партыяў, грамадзкіх аб’яднаньняў, грамадзкія палітычныя дзеячы, якія падпісалі гэтае пагадненьне абавязаліся мабілізаваць увесь рэсурс, які ёсьць у іхным распараджэньні, для аказаньня падтрымкі адзінаму кандыдату з мэтаю ягонай перамогі на прэзыдэнцкіх выбарах і правядзеньню неабходных палітычных і эканамічных пераўтварэньняў.

Пагадненьне падпісалі лідэры Аб’яднанай грамадзянскай партыі, БНФ “Адраджэньне”, Беларускай сацыял-дэмакратычнай грамады, сацыял-дэмакратычнай партыі “Народная грамада”, Беларускай жаночай партыі “Надзея”, Беларускай партыі працы, Партыі камуністаў Беларускай, руху “За новую Беларусь”, арганізацыя “Рэгіянальная Беларусь” і грамадзянскай ініцыятывы “Хартыя’97”. Пагадненьне таксама падпісалі адзіны кандыдат ад шырокай грамадзянскай кааліцыі Ўладзімер Ганчарык, лідэр “Рэгіянальнай Беларусі”, патэнцыйны кандыдат у прэзыдэнты сямён Домаш, экс-прэм’ер-міністар Міхаіл Чыгір, экс-міністар абароны Павал Казлоўскі, лідэр ПКБ Сяргей Калякін, экс-амбасадар у Эстоніі, Латвіі і Фінляндыі Міхаіл Марыніч і лідэр прафсаюзаў АПК Аляксандар Ярашук.

У гэты ж дзень было падпісана пагадненьне паміж адзіным кандыдатам ад шырокай грамадзянскай кааліцыі і прадстаўнікамі 87 маладзёвых арганізацыяў.

“Нашыя кандыдаты зьдзейсьнілі тое, што не ўласьціва наогул зьдзяйсьняць палітычным дзеячам. Гэты шлях быў цяжкім. Я рады, што ў нас шмат людзей, якія ў імя нашай зямлі адмаўляюцца ад амбіцыяў. Я ўпэўнены ў тым, што адзіны кандыдат пры нашай агульнай падтрымцы несумненна атрымае перамогу”, - пракамэнтаваў сёньняшнюю падзею лідэр руху “За новую Беларусь” Васіль Лявонаў.