Міхаіл Марыніч выступіў са зваротам да жыхароў Менску :: Хартыя'97 :: Навiны

"На вас, жыхароў сталіцы, арыентуецца ўся краіна, - гаворыцца ў звароце былога патэнцыйнага кандыдата ў прэзыдэнты, экс-пасла ў Латвіі, Эстоніі й Фінляндыі Міхаіла Марыніча да жыхароў сталіцы Беларусі. - У Менску найбольш востра адчуваецца напал палітычнай барацьбы і выразна бачныя перспэктывы, якія адкрыюцца з прыходам палітычных i эканамічных свабодаў, дэмакратыі, нармалізацыі адносінаў з сусьветнаю супольнасьцю. Пазыцыя менчукоў ужо на этапе збору подпісаў - сігналь да дэмакратычных пераменаў для ўсёй рэспублікі".

Адмова Цэнтральнай камісіі Рэспублікі Беларусь па выбарах і правядзеньні рэспубліканскіх рэферэндумаў зарэгістраваць дадатковыя подпісы за М.Марыніча, пацьверджаныя, як паведамляе ён, рэальнымі дакумэнтамі, былы прэтэндэнт назваў сьведчаньнем жорсткага палітычнага заказу - убраць яго з перадвыбарчай гонкі.

"Нягледзячы на гэта, я маю намер працягваць барацьбу, - заявіў Міхаіл Марыніч. - Я буду абараняць ня толькі свае правы, але й той давер, які аказалі мне вы, жахары Менску... Сёньня мы не павінны страціць веру ў дэмакратычныя пераўтварэньні, а аб`яднацца вакол адзінага кандыдата ад дэмакратычных сілаў. Мы разам пазбавімся ад страху і абавязкова пераможам. Будзьце мужнымі і няхай за вамі, жыхарамі сталіцы, ідзе ўся Беларусь. Мы разам выведзем нашу Радзіму з краху і прыйдзём да годнага жыцьця".