Трэці дзень галадоўкі ў Бабруйску :: Хартыя'97 :: Навiны

Вось ужо трэці дзень галадаюць чатыры жыхаркі Бабруйску, якія патрабуюць іх вяртаньня на працоўныя месцы і прадастаўленьня жыльля. Перамовы з камісіяй Камітэту дзяржаўнага кантролю Магілёўскай вобласьці не прынесьлі істотных вынікаў. Супрацоўнікі дзяржкантролю прапанавалі ім спыніць галадоўку і дачакацца верасьня, калі, магчыма, будзе разгледжана іхняе пытаньне. Але жанчыны не здаюцца і вось ужо трэці дзень стаяць на плошчы перад выканкамам з патрабаваньнем абараніць іхныя правы. Нягледзячы на пагрозы з боку міліцыі, яны маюць намер галадаць да перамогі.

Рабочая акцыянэрнага таварыства “Фандок” Галіна Гусева заявіла ў інтэрвію Радыё Свабода: “Я ўпэўнена, што галадоўка гэтая не дарэмная. Сілы мне даюць мае дзеці, якіх у мяне пяцёра, іх будучае... І яшчэ тое, што я змагаюся за праўду.”

Гэтая жанчына патрабуе ад адміністрацыі “Фандоку” кватэру, у чарзе на якую ейны муж прастаяў больш за 15 гадоў. Патрабаваньні трох іншых жанчынаў адносяцца да кіраўніцтва бабруйскай філіі Менскага трактарнага заводу. Яго работніца Яніна Аўсянік, якая стаіць на плошчы разам са сваім сынам-інвалідам, чакае жыльля столькі ж часу, колькі і Галіна Гусева.

Былы камендант інтэрнату гэтага прадпрыемства Ева Усьцімчук патрабуе ад прадпрыемства ня толькі кватэры, але і вяртаньня на працоўнае месца. Гэтую ж мэту ставіць перад сабою былы бухгальтар філіі Любоў Санковіч.

Трэба сказаць, што гэтая жанчына патэлефанавала так званаму праваабаронцу, вядучаму праграмы Беларускай тэлевізыі, Яўгену Новікаву і папрасіла дапамогі. Вы кажаце пра парушэньні правоў чалавека за мяжою, заявіла яна, але не зьавяртаеце ўвагі на сытуацыю ў Беларусі. Дапамогі ад яго яна так і не дачакалася. Аднак жанчыны дачакаліся пагрозаў з боку начальніка ленінскага райадзьдзелу міліцыі, які паабяцаў пасадзіць іх за “краты”, калі яны ня спыняць галадоўку.

Учора жанчын падтрымалі ня толькі прадстаўнік Беларускага Гэльсынкскага камітэту, але й мясцовыя зубры. Менавіта яны пастаялі разам з жанчынамі і выказалі ім сваю падтрымку.