Жонкі рэпрэсаваных палітыкаў працягваюць паездкі па Беларусі :: Хартыя'97 :: Навiны

14 жніўня ў Брэсьце пабывалі Людміла Карпенка і Ірына Красоўская. Па словах жонкі памерлага пры нявысьветленых абставінах Генадзя Карпенкі Людмілы Карпенкі й жонкі зьніклага бізнэсмэна Анатоля Красоўскага, паездкі па Беларусі праводзяцца з мэтаю “зьвярнуцца да народа, каб ён паразважаў пра тое, што адбываецца”. “Мы лічым сябе сілаю, здольнай аказаць уплыў на людзей. Нас радуе тое, што жанчыны актывізуюцца, аб’ядноўваюцца”, - сказала Людміла Карпенка.

“Мы езьдзілі ў Маскву, Парыж і Вашынгтон, - паведаміла Л.Карпенка.- У ЗША мы прасілі аб стварэньні камісіі па расьсьледаванньні абставінаў выкраданьняў і забойстваў нашых мужоў, а таксама пра тое, каб улады ЗША аказалі ўплыў на ўлады Расеі. Нашыя паездкі не былі дарэмнымі”.

Ірына Красоўская ў сваю чаргу распавяла пра тое, што ёй вядома аб абставінах зьнікненьня мужа: “Анатоль і Віктар Ганчар ехалі ў джыпе, у іх было два тэлефоны. Бясьсьледна яны маглі зьнікнуць толькі ў тым выпадку, калі выкраданьне было сплянаваным. Я нічога ня ведаю пра тое, як расьсьледуюць гэтую справу. Калі мне кажуць пра тое, што ніхто нічога ня ведае і ня бачыў – я ня веру. Я думаю, што пракуратура і КДБ працуюць. Калі Бажэлка й Мацкевіч (былыя генпракурор і кіраўнік КДБ) падыйшлі аж да раскрыцьця злачынства, іх зьмясьцілі. Гэтыя тры гады для нас - жах. Але сядзець і плакаць яшчэ горш, таму што можна звар’яцець”.

Жанчыны распавялі пра тое, што яны думаюць пра сёньняшнюю палітычную сытуацыю ў краіне і пра свае паездкі па Беларусі (сёньня жанчыны сустрэнуцца з жыхарамі Баранавічаў, а пасьля - з жыхарамі Віцебшчыны). “Пры гэтай уладзе мы нічога не даведаемся пра нашых мужоў, - сказала Людміла Карпенка. – Мы ведаем, хто заказчык. Але б хацелася ведаць, хто гэта зрабіў...”

На працягу бліжэйшых двух тыдняў у Брэсьце будзе празодзіць акцыя “Жаночы голас”, падчас якой, як сьцвярджаюць арганізатары, ня будзе агітацыі на карысьць ці супраць якога-небудзь кандыдата ў прэзыдэнты: удзельнікі акцыі будуць раздаваць мінакам лісты жонак зьніклых палітыкаў.