Міністэрства юстыцыі аб’явіла паралельны падлік галасоў незаконным :: Хартыя'97 :: Навiны

У распаўсюджанай 16 жніўня Міністэрствам заяве адзначаецца, што “у апошні час асобныя СМІ паведамляюць аб падрыхтоўцы незарэгістраванага грамадзкага аб’яднаньня “Незалежнае назіраньне” да назіраньня за працаю выбарчых камісіяў й паралельнаму падліку галасоў з тым, каб 10 верасьня 2001 года аб’явіць свае вынікі галасаваньня”. У сувязі з гэтым Міністэрства юстыцыі нагадвае, што дзейнасьць асобаў, якія выступаюць ад імя незарэгістраваных грамадзкіх фармаваньняў, зьяўляецца адміністратыўным правапарушэньнем, а “заплянаваная дзейнасьць незалежных назіральнікаў супярэчыць заканадаўству Рэспублікі Беларусь”.

Міністэрства юстыцыі нагадвае, што “назіральнікі, згодна артыкула 13 Выбарчага кодэксу, не маюць права весьці апытаньне грамадзянаў, што прыбылі для галасаваньня і тых, хто ўжо прагаласаваў. Падлік галасоў, адзначаецца ў заяве, ажыцьцяўляецца членамі ўчастковых, тэрытарыяльных і Цэнтральнай выбарчых камісіяў”.

“За парушэньне выбарчага заканадаўства, - папярэджвае Міністэрства юстыцыі, - артыкулам 167 Кодэксу аб адміністратыўных парушэньнях прадугледжаны штраф у памеры да 10 мінімальных заробкаў ці папраўчыя працы на тэрмін да двух месяцаў з утрыманьнем 20 адсоткаў заробку. Такімі правапарушэньнямі зьяўляюцца дзеяньні асобаў, якія апытваюць выбаршчыкаў – як яны зьбіраюцца галасаваць ці як прагаласавалі”, - сцьвярджаецца ў заяве.

Акрамя таго, Міністэрства юстыцыі адзначае, што артыкулам 191 ”Перашкода ажыцьцяўленьню выбарчых правоў ці працы камісіяў па выбарах, рэферэндуму ці адазваньню дэпутата”) Крымінальнага кодэксу прадугледжана пакараньне ў выглядзе грамадзкіх працаў, штрафу, папраўчых працаў ці пазбаўленьне свабоды да пяці гадоў.