Уладзімер Ганчарык настойвае на правядзеньні адкрытых тэледэбатаў кандыдатаў у прэзыдэнты :: Хартыя'97 :: Навiны

Апазыцыйныя сілы напярэдадні прэзыдэнцкіх выбараў зрабілі тое, чаго ніхто не чакаў, - аб`ядналіся. Пра гэта заявіў у сваім выступе 19 жніўня ў Менску на ўстаноўчым сходзе грамадзкай арганізацыі "За новую Беларусь", адзіны кандыдат на пасаду прэзыдэнта ад шырокай грамадзянскай кааліцыі Уладзімер Ганчарык.
Паводле словаў Ганчарыка, ужо завяршаецца праца над праграмаю адзінага кандыдата ў прэзыдэнты, у якой будуць дадзены адказы на пытаньні, што хвалююць грамадзтва, і вызначаны крокі ў кірунку незалежнасьці й дэмакратызацыі Беларусі. Ганчарык мяркуе, што перадвыбарная барацьба будзе напружанай і нават небясьпечнай.

Ён распавёў пра свае ўражаньні ад паездкі 18 жніўня ў Чэрвенскі раён Менскай вобласьці, пра тое, што цяперашнія ўлады рыхтуюцца да фальсыфікацыі выбараў. Як паведаміў Ганчарык, па аповедах "некаторых сумленных і прыстойных людзей, якія займаюць пэўныя пасады ў кіраўніцтве", выбары літаральна па кожным раёну кантралююцца, акрамя дзяржаўных чыноўнікаў, прадстаўнікамі Савету бясьпекі і іншых сілавых структураў. Іхняя задача – любым коштам не дапусціць, як самі яны гавораць, іншадумства ў раёнах.

Паводле зьвестак Ганчарыка, тэлефонныя размовы кожнага старшыні калгасу, саўгасу або іншага больш-менш адказнага чыноўніка ў раёне праслухоўваюцца і кожны дзень складаюцца справаздачы пра іхныя настроі. Перад "вертыкальлю" зараз пастаўлена задача арганізаваць датэрміновае галасаваньне больш чым 30 адсоткаў насельніцтва правінцыяў. А пераносныя скрыні для галасаваньня ахоўваюць супрацоўнікі міліцыі.

Паводле словаў адзінага кандыдата, такім чынам ствараюцца ўмовы для фальсыфікацыі прэзыдэнцкіх выбараў. "Мы ня можам гэтага дапусціць і павінны пра гэта сказаць усім выбаршчыкам, - сказаў Ганчарык. - Вас нахабна спрабуюць падмануць". Ганчарык заклікаў неадкладна пачынаць канкрэтную працу з выбаршчыкамі. Па яго назіраньнях, адбыліся істотныя зьмены ў свядомасьці беларусаў. Яны цяпер не баяцца, выслухоўваюць розныя меркаваньні і самі робяць высновы.

Ганчарык таксама папярэдзіў, што, паводле ягоных зьвестак, супраць яго й ягонай каманды рыхтуецца шэраг сур`ёзных правакацыяў, а таксама фарміруюцца групы спэцыяльных правакатараў, якія павінны будуць раздаваць ад імя яго штаба розныя ўлёткі экстрэмісцкага зьместу, а таксама грошы нібыта на подкуп выбаршчыкаў. Ён таксама зьвярнуў увагу на тое, што ў дзяржаўных СМІ ідзе непарыўны паток паклёпу ў ягоны адрас, якому ён супрацьстаяць ня можа."Людзі павінны ведаць, што ўсе гэтыя правакацыі раблю не я і ня мой штаб, а ўлады", - сказаў Ганчарык. Ён будзе настойваць на правядзеньні прамых тэлевізыйных дэбатаў з усімі кандыдатамі ў прэзыдэнты.